呢頭返工，呢頭辭工!!!

十個禮拜的產假完畢了，6月13日返工了!

其實產假途中就有想，如果老闆又要我經常性返汕頭了，會怎樣呢? 一日半日都冇所謂，但返汕頭次次都要stay最少3-4晚的。我目前仲有餵人奶的，晚上個仔又自己湊，其實真係返唔倒。

但係，同team果個女仔都係大肚家嘛，計算日子佢而家應該成7個月肚了。我聽聞，佢大住個肚期間都有上大陸，仲要頂我d 嘢! 而家終於捱到我返唻，到我頂番佢d 嘢喇，要代佢返大陸的機會真係好大。

冇得諗咁多，煮到埋唻先食啦!

一回公司，老闆大計一籮籮咁，人就得2個，仲有1個就唻生o添，聽得出佢來緊7、8月邀請好多鬼佬唻汕頭廠，想發掘業務。我醒起7月的曼谷之旅，驚萬一佢想我返大陸但我要去旅行撞期，所以6月底已同佢攞定7月18、21日2天假。

呢個曼谷之旅其實係去年定的，book好機票、做哂資料蒐集先知有咗，咁就延期到今年的7月，而且冇得再改期了。我同肥佬都好期待呢次旅行，當充充電!

老闆在汕頭，假紙俾咗佢秘書。秘書打電話問佢批唔批假，佢發現7月22號的上午預咗d有個鬼佬唻看廠，佢預咗我要跟，所以唔批。

秘書覆我 "老闆唔批喎，你點解唔d早入紙?"

我: " 而家6月底咋姐姐，仲唔夠早呀? 不嬲間公司就冇制度啦，有時突然要攞假，第二日補番假紙都冇人講架啦，而家唔批就唔好話我遲攞假啦!"

秘書: "老闆話唔批，要你呢日返大陸............."

其實而家係我諗過的局面，一早就想過佢要我返大陸會點? 會唔會唔做呢? 而家咁樣，更加迫我做咗決定。旅行我就去梗，唔批就唔做喺啦。

我答秘書: "咁................我唯有唔做啦，假我一定要放的了。"

佢問咗老闆，隔咗一個人，語氣表達都差d，可能變成咗 "polly話你唔批佢就唔做呀，咁點呀老闆?"。老闆回覆 "我都係唔會批，佢要咁都冇法，咁就叫佢預備應該遞上唻o既嘢啦!!"

秘書轉達咗，我都好平靜。其實都冇壞o既，迫我做咗決定都好。如果唔係去旅行，佢又要我返大陸，我處喺就咁單純為咗要返大陸就唔做，可能要掙扎好耐，而且會後悔.............

過咗星期六日，星期一老闆返咗公司，信我準備好，我同咗同team的女仔講咗呢件事先，禮貌上通知聲。佢話 "等我再同老闆講下!"。

我唔做，佢首當其衝! 大住個肚，冇咗個人頂! 而且我果份要頂埋!! 佢要生的時候呢條team便真空!

佢同老闆講咗一陣，叫我入埋去。三個人傾，老闆又落唔倒台，話咩我唔係對唔住佢，係對唔住個女仔呀、又話諗咗一條好好的career路給我呀，而家自我放棄好戇居呀、好好再考慮下要旅行定要前途。我想，佢係冇估倒我唻真的。

我都明白，佢一定覺得我過橋抽板，入咗唻2個月就有咗，攞咗個有薪產假就唔撈，都真係嬲o既! 所以我冇否認過我唔啱。但係諗深一層，講唻講去都係為咗22號嗰一日假咁大把啫，佢又使唔使迫到我去到唔做呢一步先............真係冇人頂咩? 講緊條鬼佬唻看廠呢半日時間啫，就算冇人上去，佢自己本身都喺上面，可能佢真係下唔倒啖氣，老闆一定唔會屈服，一定係員工屈服啦!

佢情願我唔做都唔相就，可能又覺得我唔重要啦，咁..............留响度都多餘。而就算呢次佢就咗我，都會記响心上，過幾日又要我返大陸，我再say no就冇point了。

離開老闆房前，佢叫我再考慮下要邊樣嘢，前途 vs 旅行。出咗唻，同個女仔講，我就冇嘢要考慮架喇，我要前途就唔遞信啦，如果老闆企硬就算把啦。個女仔話老闆多數都企硬了，因為佢本人已經試過三次，又係咩都 book哂，為咗d客都要 cancel!! 我就冇咁偉大喇，又唔係咩大公司，又唔係好可惜。

個女仔好無奈，來緊佢的產假都放得唔安樂，個老闆一定每天係咁打電話chur爆佢啦，我放緊假嗰陣，佢夠胆死叫我一坐完月返工o添................

都好的，解脫了。仲可以好好咁plan我的曼谷之旅!!

無工一身輕..................................返唻先算啦!!