阿仔留院的日子

因為感染，BB結果多住了7天醫院。DAY 10的那天終於出來了。

BB在醫院特別護理病房中的日子，我已經出院，在家中坐月的日子，SUPPOSE就不能走動，但係個心肝寶貝尚在醫院中我又豈會安樂吖。

每天夜晚7-8:00係餵奶時間，雖然辛苦D我都堅持每天到醫院餵佢，我實在太掛住佢啦! 我每日瞓醒就盼望呢一小時，BB樣子日日不同，佢應該收哂水了，唔知變成咩樣? 有冇食奶奶? 佢會唔會食慣哂奶粉唔肯再俾我埋身餵呢?

看到BB，已經唔再需要瞓燈箱，黃疸退了，但手上仍是綑綁住一大嚿繃帶，固定住支豆豆，抗生素就是每天通過這豆豆注入的。一支咁粗的針，打落咁細的手手上，諗番起我都流眼淚! (做咗阿媽係咁)

BB收水甩皮中，成塊面、手、頸都係皮皮，手背上的皮皮因為包住咗繃帶甩唔倒，結成一塊塊的，加上乾咗的血痕，倍感BB受苦! 塊面仲有一個頗深的橡筋痕，係照燈箱帶的眼罩造成的，可能太緊了。

小B，累你受苦了。

會唻餵BB的媽媽/ 爸爸不多，特別護理病房好多時就我一個親自餵食，其他BB都是姑娘搞掂的。不過病房中有5-6個B，姑娘就一個，任由D BB哭得多可憐，也只能等候姑娘姐姐做完一個先一個。我每天7:00 sharply就到，BB吃得準時，可憐隔唻床的BB，我看著他餓得哭到7:30，結果累得滯自己瞓番，都未有得食! 如果我唔唻，我個仔一定都係咁，冇人理! 所以點都好，就算奶奶唔係太贊成坐月中的我出街，我都一定要來，BB自己一個留院已經好可憐，不能還要佢挨肚餓!

BB day 9去看他的時候，發現他的豆豆本是插在左手手仔上的，這天竟然換了右手!! 咁咪即係挨多咗針?! 點解架??!!!!

姑娘話BB自己扯甩咗，所以要再吉過! 都唔知係咪既............! 咁細個點識自己扯甩個豆豆吖，D繃帶綁得咁實!!

我都叫日日可以親親BB一小時，好過我老公了，佢摸都冇得摸!! 我睇得出佢好掛住個仔! 我同佢每晚瞓前會做的，就係睇相，佢只能看每天我餵BB時偷影的相片，摸住張相咁瞓，真係冇誇張架!

出院當天，坐的士後便拍個照whatapps給不能來探出院的老公，我感覺BB在笑啊! 梗係!! 有咩好得過返屋企吖!!