唉...................呢幾日真係好痛苦!
座又諗，瞓又諗，搭車又諗，做嘢都諗...........
仲失眠咗三晚了............
今朝起身，額頭仲生咗一粒壓力瘡!
真奇怪! 人地話影結婚相前一晚就話大壓力啫，我不知瞓得幾好，仲冇黑眼圈o添。
邊有人..........影完相成三四日，反而晚晚瞓唔著，勁大壓力，勁擔心，擔心d結婚相影得唔靚，但又好心急想睇............!!!!
同肥佬講，佢話: d相唔靚有乜咁擔心，要擔心就擔心d相太靚，到時要揀多好多張，冇哂錢!!
唉............男人都係現實d.......!
心掛掛，迫唔倒自己放鬆，5月9日快d到啦，就唻頂唔自喇...........
我影咗結婚相喇!!!!! 
真係好攰.........好攰好攰好攰........!
11:00am - 11:30pm之旅，耗盡我所有精力 (雖然要做的動作主要是笑)。出發前攝影師同我夾路線，我堅持要影的是大埔海濱公園，其他地點冇乜所謂，盡量都係自然景、樹林、草地、花海、沙灘。攝影師提議我去完大埔，便入欣澳影，跟住去埋影青馬橋夜景便回zara影studio。我心想只去3個景點，好似好少地方喎，我想去石澳影石灘、又想去影下赤柱、咁咪乜都去唔倒囉.........。攝影師解釋話8小時外景時間其實唔多，而且我換衫轉造型都要好多時間，最緊要係我會好快攰冇精神咁話。不過，佢見我少少扁咀，都話一係時間許可便去埋廸欣湖啦，都有湖景同小屋，但冇可能過埋海影赤柱的了。佢咁講到，我都覺得ok囉。
11:00到zara，由化妝師Dickie替我操刀化妝，心情好興奮。但都發生咗一些少插曲，事緣我幫肥佬去造咗一件靚靚恤衫，仲買咗一對好靚旳袖口鈕，等佢都威下吖嘛。點知，o係佢換好哂衫後，有人倒瀉奶茶，淺倒佢成身係。我件靚恤衫便泡湯咗!!我梗係眼火爆啦
!! ZARA的人馬上攞佢地的裇衫俾肥佬替換 (因為係佢地D人倒瀉的)，但係D款好普通仲戴唔倒袖口鈕 (所以我先去造一件囉)，我好唔開心呀! 個化妝師見我唔開心都講D嘢引下我笑，等我變番靚靚心情出發囉，咁始終今日應該係開心o既，化化下妝見倒Dickie的手勢咁好，我都開心番 (佢真係化得好pro，果然星級!)。
1:20pm出發 (化咗2個幾鐘)，我有2個朋友幫我駕車，原本一部7人車都可以的，但佢地怕太迫會整巢我d衫，專登出2部車，真係多謝佢地 (係嘉穎同朱古力呀!!)。同埋，原來跟車出去的有攝影師ADREN、佢助手阿風、化妝師Heidi、助手阿Kit共4人，計埋我地兩個加司機，都成7個人，座哂落一部7人車度都真係幾迫o家，好彩有2部車。由於佢地2個都係車手，用咗20分鐘便由尖沙咀去到大埔公園。
大埔海濱公園
首先攝影師ADREN睇睇環境，見倒有feel的景便叫我就位。佢好一絲不苟呀，擺咗5分鐘post佢都唔影，原來佢唔滿意我條鋼紗"are"起唔太自然，要個化妝師助手除咗先影，所以我今日所有衫都冇著住鋼紗呀。o係呢個公園，影咗我最愛的花海(有實Q呀，不過佢隻眼開隻眼閉，幾好人
)、大草地、樹景、圍牆景。
淨係一個公園，我已經有D攰，唔係講笑o家，因為ADREN實在太高要求喇，少少寒背、笑容麻麻、下巴唔夠高、頭紗左右唔對稱.....佢都唔肯影，要D助手左執右執先得，所以都辛苦哂佢助手阿風。
朱古力同嘉穎跟足我地成程，佢地八掛一路睇住ADREN影完的相，佢地話: 佢唔係攝影師，佢係一個殺手，揀相o個日實殺到你地一頸血! 有好多張相，你地睇咗都冇可能唔揀。死得喇.........
要去下一個景點，化妝師、助手同我o係個toliet度換衫轉妝轉頭，整咗大半個鐘，4:00pm出車去欣澳。
欣澳
欣澳有咩? 有沙灘、好多俾蟲蛀了的木柱、有d可以企上去的海中浮木，環境唔錯的天然外景。不過好多蚊咬，我仲要著住件deep V露背，咁多肉，D蚊仲唔開餐咩!!呢度冇乜人唻家嘛!!!真係餵飽D哂蚊。最驚險是要我企在海中浮木o個陣，我條裙好長，攝影師話係預咗放個裙尾落水，總知自自然然咁。我自己站在海中，條裙越濕越重，聚埋一邊，又大風，舊浮木開始左右搖，我著住4吋高踭鞋，開始腳震，企唔穩喇，有幾下真係feel倒自己會跌落水o家!! 好驚呀!!! 淨係識得嗌救命，肥佬本來預備緊影單人照，佢同阿風都停哂手即刻走過唻救我囉，真係嚇死呀!!
欣澳附近仲有個沙灘仔，水好清o家，我地o係呢個沙灘度影咗一d motive些o既相，例如o係個灘度跑呀，企落水kiss呀咁。著住4吋高踭鞋o係個灘度跑，好難受o家....條裙經歷咗好多，已經又濕又污糟，我好想換衫了!!!
呢度影咗好耐，留到7:00，去唔切廸欣湖了。不過我好攰呀，我o個刻都唔再介意了。
下一站去青馬影夜景，7:00入toilet轉造型，7:30出到唻個天黑哂了。
青馬橋
8:00幾到咗汀九附近一個小小沙灘，好清楚見哂成條橋的，真係唔知有個咁靚的地方，仲以為一定要去馬灣先影倒咁靚的青馬橋夜景o添! 助手阿風就辛苦了，因為影夜景，佢自己一個人拎住巨型腳架、強力閃光燈 (影樓用有把遮o個種呢....)、一舊好大的電池、不同的鏡頭，行咗好多層樓梯落到去個灘度，做助手真係辛苦! 不過跟住ADREN，佢會學倒好多嘢o既。
呢個景太靚了，肥佬可能想以這個景做油畫，自己要求ADREN影幾張抱起我的 (想個feel 開心d的)，ADREN都好樂意。為咗襯呢個景，我就係著番o個件閃石deep V 大露背漸變紫A-line裙了，夜晚著，個deep V閃石邊仲閃，我都冇戴任何手飾，清少少。
影咗45分鐘倒，又有一段小插曲!! 上番條又黑又窄的樓梯，化妝師Heidi替我打燈上樓梯，當時好靜的，都冇發現原來條樓梯有排鐵絲網，仲有好多頭狗，突然一齊咈我地，太突然喇，嚇到Heidi尖叫一聲成隻手爪落我個背脊度!! 痛死!! haha!!
去到部車度準備走的了，ADREN見倒條馬路o係微微街燈下又話好有feel，又捉進我地影多10分鐘，真係服咗佢!! 8:45pm，終於登上車，返zara studio了!!
8個鐘的外景，咁就完咗，慶幸今天一滴雨都冇落過，多謝!!
ZARA 影樓
返到studio，已經9:30，化妝師馬上幫我轉妝，換埋最後一套衫，呢套係婚紗唻的。肥佬第一時間睇下件污糟咗的恤衫先 (zara的人幫我地洗咗)，好彩d奶茶漬已經冇咗，件衫又乾咗，肥佬就索性著番呢件恤衫，帶番對靚靚袖口鈕，影埋最後的呢輯相。都算完滿吖.....
估唔到一間細細的studio房，都可以影咗成個鐘，我專登帶埋豬B同梅菜子唻威威，等佢地都上下鏡 (訂情信物唻o家)。Studio影的相，好多個post都冇乜笑容，ADREN話想影得COOL D，估唔到佢影足一日都仲咁有精力，又趴地又踎低，真係不愧是星級攝影師，果然好專業!
11:00pm，真真正正完成哂今天的影相工作，卸妝了!!! 同時卸下所有緊張同壓力，可以食飯喇!! (冇食過嘢呢!!)
5月9日，有相睇，ADREN大大話話影咗600-700張，我點樣可以揀45張出唻呢???
剛從ZARA回來完成FINAL FITTING，有時上天的安排，真係好奇妙!
點解咁講? 話說我在揀衫當日，因為d款式唔合自己style，晚裝o個2件，有一件揀咗隻色超搶眼的桃紅色，其實我唔鐘意o家，但拖咗好耐，又見冇乜得好揀，所以要咗。回到家想完又想，好後悔呀!後悔自己貪求其而揀咗一件根本唔鐘意的晚裝!!
我都諗埋d衰主意o家喇，諗住.........fitting o個陣屈機話試o個陣個feel冇咁差，現在真的好唔鐘意迫佢地轉俾我。但都覺得自己最後都會做唔出，安慰定自己，桃紅色可能影出唻都幾好呢咁..........
點知，世事無奇不有，個sales攞d衫出唻，我見唔倒桃紅色o個件喎!! 原來，另一個sales姐姐替她mark低我揀咗的衫的code，但佢mark錯咗，冇mark到桃紅o個陣，mark咗我fout咗的另一件。個sales即刻話 "得得得! 而家幫你即刻改，好快!!"。
我成哂機話 "洗都冇洗過，我唔要呢件"，即時揀過一件晚裝 (奸!!
)。再看看所有款式，今晚返咗幾件當日冇的款 (可能當日外借咗出去影相未返啦)，有一件deep V大露背、漸變紫A-line，個V位鑲哂石的，又搶又靚，我即刻就試咗。因為個sales都唔好意思搞錯咗d我衫，都好冇所謂由我轉。
最後都揀咗呢件deep V紫呀! 真係好靚，留唻影夜景一流!!
本來，我還在囉囉攣要穿一件不喜歡的衫去影最緊要的結婚相。無端端到final fitting呢一刻，個天都係幫我settle咗呢件事!!真係好奇妙!!
撐我的話，希望明天影相，一滴雨都唔好落啦!!! 拜託拜託!!!
為咗4月24日的pre-wedding婚紗相，好多嘢要預備呀。
1/ 為肥佬造恤衫---因為唔想要zara可訂的只分大中細碼的唔啱身款，所以貴少少訂度。$380@百利商場積意馬
2/ 為自己造高踭鞋---點都要辛苦一次，造了對4吋高的白色婚紗鞋，閃石鞋頭 + 閃石ribbon綁帶，$388@金都 (老闆收平咗我呀)
3/ 大眼仔con，買咗! $100
4/ nude bra，買咗! $79
5/ 整gel甲，整咗! $198
6/ 買定妝安瓶，買咗! $30 x 2 = $60
7/ 手飾，都係諗住帶返對婚戒去影，唔刻意去配搭其他了。
8/ 減手臂---現在每天努力做毛巾操，同玩纖纖手套電手臂，希望到時firm唔好咁"byebye"啦...
9/ 做mask---工作關係，護膚品多多都有，每日都敷保濕mask，呢排狀態不錯呢!!
4月23日要到zara final fitting，唔知d衫得fit唔fit呢? 希望著得瘦d啦....
期待了2個月，心愛的婚戒終於攞得喇!!
真係見親都好想戴，不過一日未到921，點都唔戴得住o既.....
為免自己成日攞出唻玩，我已經鎖好咗對戒指了，唯有睇住相等到o個日啦...
昨天去了ZARA度揀影結婚相那天的衫。
目標係2 婚紗、2晚裝。ZARA出名衫靚，諗住死啦，實要做好多決擇!
原來唔係囉，ZARA不算多選擇，而且多A-line，我著A-line最鬼唔好睇的了，都係集中鋼紗款。不過話哂影結婚相，始終著A-line係飄逸d，又唔知應該揀乜顏色好，揀到好頭痛。
最後揀咗一件古典宮廷式婚紗，不是純白色的，帶少少米黃，款都好靚o家，希望影出唻都靚啦。另一件是吊帶款式的婚紗，白少少，但都不是好雪白的婚紗，而且2件都是落鋼的，我係影外景相，不知會否不太夾呢? d 姐姐就話吊帶o個件可以唔用鋼，叫我放心咁話，但我都係擔心中...........
晚裝方面，揀了一件非常deep V的幻彩藍，另一件桃紅到爆、少少A-line feel的晚裝。2件都不落鋼紗著的，開頭d姐姐攞咗d鋼紗款色唻試穿，靚就靚o既，但不適合出去影相囉，適合擺酒著多d。揀呢兩件都唔係非常心頭好唻o家，不過揀無可揀咋。
ZARA的衫，大部份不適合著girgle，只可著nude bra，佢叫我買埋，佢話佢地d nude bra好嘢唻o家喎，我自己本身都有，我唔覺得有咩分別，佢賣$650蚊，我買o個陣$100蚊，冇o係佢度買埋呀，不過佢地d sales一o的都唔hard sells o既。
不過有d意外o既係，之前話我個plan係星級化妝師替我化妝跟住有化妝師成日跟住我家嘛，昨天個負責人才clarify，星級o個個是在studio幫我化好妝，便不會跟我出去了，跟我出去的是一個助手，但不會轉妝只會補妝。如果想找他們的化妝師跟出去，便要加$1000蚊，星級o個個就加幾多錢都不會出去的了。我覺得呢度有d搵笨囉，我有4套衫，化咗頭一個妝，之後全都靠補妝，連頭髮造型都唔轉，有乜可能吖，即係局我一定加錢啦，化妝師點可以唔跟住全日吖，最後唯有就範囉。
佢地另外有花球套餐，$880蚊有花球+鮮花頭飾+男仔的襟花，花球有約10個款可以揀，都好靚o既。雖然自己影相前一天去旺角搞掂都得，但最後都係費事煩喇，join埋啦。
而家，個plan已經由 $8999 加咗 $1000化妝師再加咗$880蚊花球，over咗$10000了。聽講，幫我操刀o個個星級攝影師的功力，足以令d新人o係揀相o個日死得好慘o家，唔知我會唔會咁死呢?!
這天的評分是
，睇埋影出唻好唔好先講啦。
上星期試了生平第一次的果酸換膚療程。
都唔係專登想做，只是買埋買埋的facial月票半年都唔用一次，諗住一得閒去便做過一次抵幾次的勁treatment，補補飛。
可能我的皮膚薄得滯，即使是"入門"級的輕怡劑量，都頂唔順，做完咁多日，甩皮甩足咁多日，又易損，整到現家花臉貓咁，好多印。又話做完塊面會滑好多，我覺得都係差唔多啫，真係死蠢。
唉.......4月24號便影結婚相，睇唻要做d勁勁漂印mask，搞番白塊面，唔係實好唔上妝喇....
大笨蕉 大笨蕉 大笨蕉 大笨蕉.......
想用最短的時間，去做賣相與味道雙全的蛋糕，便是它......NEW YORK CHEESE CAKE。
My receipe:
1/ 消化餅碎70g + 牛油溶液35g混合好再壓實於6吋蛋糕模底，180度焗10分鐘。
2/ Cream cheese 250g + sugar 60g打滑，加入sour cream 60g 、egg and egg yolk各一打滑，可加少少vanilla ex.。
3/ 視乎粉漿的稀杰度加入低粉，不要多過9g。
4/ 倒入已放涼的餅底上，隔水170度焗30分鐘，熄火，再於焗爐中"牛"多一小時，取出雪過夜。
5/ 2-3湯匙 sour cream + 7g sugar + 少少milk混合好塗在cake面中央形圓形，再雪一雪，可放生果裝飾。
