今日同媽咪去試衫。
去到顯卓，媽咪衫的款式不多，得廿零件，d款有d娘，又唔係好大件 (我媽媽都係肥肥的身型)，試咗成五、六套，我媽都皺埋眉咁，心知不妙。
後唻sales姐姐偷偷地攞咗佢一個客度身訂造的一套全新絲絨重釘工晚裝出唻，俾我媽媽試。佢話係個客訂造剛送到，佢本人都未試o家，不過見我媽的身型相若﹐偷偷攞唻俾我媽媽試穿。
一穿之下...............果然貴嘢係好睇d! 雖然偷咗步試人地的衫，都唔理喇即刻confirm......................不過................盛惠$1700大元!!
唉....我自己的一套都係$600蚊，真係一套抵三套!!
不過，媽咪衫係我最心煩的一個item，咁快搞掂咗....我都開心，最緊要媽咪都好鐘意套衫
遲下同未來奶奶又上過去，希望佢睇得啱平果d....唔使我咁破費啦!!
媽咪套衫...........
顯卓試衫
前幾天去了試婚紗同晚裝，非常滿意。試咗4個鐘，一d都唔覺攰，sales姐姐又非常熟手，我起碼換了2-30套。我自己揀咗好多件試穿之餘，佢覺得靚同認為中我心水的也會主動地推介給我，一點也不求其，讚!
顯卓有好多衫，我當時在expo join，看過相簿，已經唔會擔心冇乜衫揀，只係怕看中咗的已經俾人mark咗啫。好在當天我都可以全部試哂之前在相簿睇中的心水，亦都mark倒，又完成咗一件事了
以呢個價錢、呢個質數、呢個件數、同埋快快手手、唔hard sell、冇黑面的service，今次俾.......10個
今天再同肥佬行一次結婚展。
第一站---鴻星訂酒席
其實一早決定好，只係今天才去落訂，原因是在expo落訂d優惠更多。九龍灣鴻星個場好靚，樓底好高，decoration都好好，根本唔使自己再找decoration公司去做。今日expo仲多送我鴻星今年自己出品的嫁女餅，慳番不用過大禮時自己去榮華買了。我俾5個佢。
第二站---PN wedding ring
我地用好科學的方法在云云咁多對戒指中選出最愛，真係多謝PN個sales姐姐。雖然OUT-BUD，但既然係用咁科學的方法選出來的，我同肥佬都好滿意，我俾5個佢。
第三站---ZARA BRIDE
今日比昨天多人，老闆娘一見到我就認得 (梗係昨天同個FRIEND在這裡傾太又拗倒勁多JETSO，化灰都認得)，肥佬再嘗試傾多少少優惠返唻，但都唔成功，老闆話 (普通話) "所油可以鬆的東師疑經忌她喇" !!
不過，肥佬今天發現了一樣我沒有留意的地方.............是......................他們影外景是不包車的!!! 我要自己預備定一部七人車仲要有司機........再唔係佢地幫我安排但$180一個鐘。雖然計落即使加1800蚊再租車我都係好甘願 (因為個PLAN還是好抵)，但又一次俾肥佬話我極度唔細心，我俾自己5個
!!
第四站---顯卓
今天只是帶肥佬看一看D衫，同埋俾錢。今天再去，個SALES姐姐認得我返唻幫襯，送多咗一件衫(而家$3680/6件)俾我呀! 我還JOIN了她們的化妝。其實我揀MUA都好picky o家，但聽佢地講下講下，話只要JOIN了PACKAGE便可任試任揀，顯卓有28個MUA，咁我應該點都揀到個好o既，咁不知不覺便join咗。
而家有少少擔心，始終未見過佢地的作品。佢地的MUA都唔係平o家，又不會FREE媽咪同奶奶妝，但都算啦，因為行咗好耐，個人有D攰，都冇乜氣力再諗嘢。而家諗諗下，有少少覺得MUA呢PART衝動咗。租衫我俾4個，MUA.....我俾2個
，希望試妝後唔同感覺啦。
第五站---專業制作
婚禮攝錄公司。平囉...但影SNAP一般。睇過咁多咁多間，冇一間贏倒freelance FRANKIE C.，佢影SNAP好好，唯一唔知佢影VIDEO同團體照的拍檔點樣。我諗緊，一係JOIN專業制作的1P+1V (話哂做慣做熟)，再搵FRANKIE影SNAP，咁係最好的，但TURN OUT條數會多使幾千蚊。諗唔掂，所以EXPO冇JOIN到任何攝錄公司。
行咗6個鐘，太攰了，走咗。今日搞掂了婚戒、酒席、PRE-WEDDING、租衫、MUA，仲差婚禮攝錄咋，GOOD!
今日是我第一次行婚紗展，target: pre-wedding photo、租衫、化妝、婚禮攝錄、婚戒、酒席
肥佬要返工，唯有我自己行一轉，鎖定target，明天再同佢唻作決定。
PRE-WEDDING PHOTO - ZARA BRIDE
我最想在expo confirm倒的是pre-wedding photo。又想平又想多相又唔要娘又要有質素，真的好難搵!
之前行金巴利入過"emotion wedding house"睇過，呢間都中咗"平"、"唔娘"同"多相"呢幾瓣o既，硬係質素多面..........唔係話佢唔好，就係覺得個佢show俾我睇的samples，唔太中我想要的feel，太"natural"了......
佢地唔興執相....所以d作品似係自己攞住部機周圍影咁，冇乜結婚相feel。問佢香港外景邊度有花海、有大草地.........全部都唔知，一味話大陸先有........証明佢地影外景經驗唔係好夠，呢樣嘢係我遲遲未能放心找呢間的原因。
今天之行果然不令我失望! picky的我最終選擇了 "ZARA BRIDE"，平多相唔娘啱FEEL質素好! 心動價$8988包45相 (原本得30幅)、大水晶相簿一本、中型猄皮面相簿一本、BB水晶相簿一本 (手掌咁大)、仲送埋雜誌相簿俾我 (值$3200 喎)，油畫座枱相架簽名布多謝卡呢d當然預咗包埋啦，最令我心動的係頭50位客人join，會upgrade用到個星級化妝師DICKIE，同攝影師ARDEN (也即是zara的老闆)，平時要額外加各5000蚊才可appoint 啊!
講番ZARA，其實呢間本來係租衫出名的.....................................出名"貴"。所以在金巴利行親我只會"過門不入"，咁平可以join到PRE-WEDDING photo，係因為佢地想多D人知zara租衫外，影婚紗相都係好掂，為求宣傳先會做咁平。我真係誠意推介，即日仲介紹了一個姊妹同JOIN，老闆娘見我地二人同JOIN便送多一本BB水晶相簿俾我地，NICE!!
租衫
我打算選擇"顯卓"，夠 "平" 而且質素不差。最中我係佢夠 "多款"可選擇，婚紗多樣化: 公主feel、A-line、grand款、拖尾，晚裝如是。我還未落訂，未正式上門試衫，所以o個D sales姐姐黑面呀、寸呀.............我尚未經歷，遲下update。
化妝
見倒一間 "CARA"，d before/after相真的嚇人! 嚇在個MUA的手勢真的好，真係好差都可以俾佢化到勁靚! 但同樣佢個價錢又勁貴，嚇走了我。
又見到一間 "BIO-BEAUTY "，向我勁SELL咩切色，話終生受用...........但呢班人太太太熱情，拍哂手咁歡迎我JOIN (但我仲未話JOIN!!)，話 "我地拍手啦! 又有一位客人感受倒我地切色係幾咁幫倒佢!!" (痴線，我都仲未明咩叫切色，幫乜叉?!!)，仲地想即時局我開單，我梗係即閃啦，留低電話話 "會考慮"囉。[佢地即刻少少黑面]
化妝呢part最後都冇乜心水選中。
婚禮攝錄
我一心想找的是freelance FRANKIE C.。所以冇乜點細心搵攝影，明天先同肥佬一起再行囉。
婚戒
未決定啊。想搵D唔娘的款，不要周生生同六福。見倒PN，等肥佬唻一齊睇!
酒席
等埋肥佬唻一齊去鴻星落訂。
