BB改名篇，終於定案了!

俗語話 "最怕改壞名!!" ，我同肥佬都有共識，就係搵個師傅幫BB改個名。

我地打聽過，找 "蘇X峰" 改名，$1800。其實錢唔係大問題，一世架嘛! 只是我地覺得唔會係師傅去操刀，好大機會找徒弟，甚至係輸入D資料入電腦後隨機抽樣咁俾幾個你交功課都唔定!

之前買樓識咗個agent，戴哂鑽石勞咁，應該撈得好掂，佢無拉拉打電話俾我老公 "傾閒計" (好怪，好多年冇聯絡了)，應該係想搵番d舊客再發掘一下生意啦。閒聊間我老公同佢講仔仔剛出世，正在找師傅改名。個agent即刻有refer! 佢話佢一路用開個風水師傅的，自問自己都撈得好好，個師傳替他擺個文昌陣助佢個仔讀書後，今年個仔仲取得學校奬學金! 佢也有介紹呢個師傅俾其他客。我見個agent咁掂，個師傅應該有不錯的功力佢先敢介紹俾客o既 (唔係就得罪哂d客嘛)。

無拉拉在我們找改名師傅的時候，呢個agent自己打唻報到，真係好橋! 我同肥佬都信緣份，即管找呢個師傅問下。

佢收費$2800，會俾5-6個名你揀，同簡單批下bb的整体運。

師傅親自上門講解，仲整咗本書仔詳細介紹bb命格屬咩、五行欠乜，同介紹每一個佢推薦的名對邊方面有幫助，例如從商運、讀書運、貴人運等等。原來我bb命格好多木，但又欠金火，所以不能再找屬木的字，而又要用金火的。仲要計埋筆劃，check好哂成個名各方面 (咩天、地、人...)都為 "佳" 先會推薦的。

但佢推薦的名，唔係太勁就有點老套! (又冇得講o既，佢只求個名好，幫倒bb)

帥龍啦 (天子feel?!) 、浩嵐啦 (好勁呀!!)、冠豪啦 (勁茶餐廳feel囉)，冇一個鐘意!!

我地 "彈咗師傅鐘"，話真係揀唔倒，可唔可以在 "重貴人" 同 "聰明" 呢兩方面再俾多幾個唻揀下.....

師傅都冇reject o既，話要再遲多2個禮拜先交倒貨囉。

另一面，我同肥佬根據師傅說的屬金火、同計筆劃的方法，自己草擬咗一堆名，再download d apps唻算下是否 "天地人" 都 "佳"，send番俾師傅問佢用唔用得。

反反覆覆搞咗2-3個禮拜，在要攞出世紙的deadline前2天，終於扑搥了。

帥熹，我寶貝的名字!! (係我改架，再由師傅批過贊成的，yeah!!!!)