倒數30日.....回想

今日8月22號，一早瞓醒，計計日子，距離BIG DAY仲有剛好30日。

一陣晏D會去取帖，已經印好咗了，多謝昌記的伯伯，替我印上URGENT印仔，讓工廠替我極速一星期印好!! 我的工作表又可以多個 "剔"

好似...............乜都預備好喇喎。

哈.......咁就剩番一個月時間了。

回想起上年12月20日決定結婚，因為今年年初買咗樓，但又想再儲多少少錢結婚，所以諗住放租出去 等人幫自己供。租期死約一年，所以計過，點都要係2010年先收得番層樓，預備結婚用。

搵師傅摘日子，日子是2010年的10月。諗住大把時間啦，仲有成差唔多兩年時間預備。但我朋友文仔同碧茜話，而家 "放租等人供呢支歌仔" 唔係唱得咁好聽，好多雜費是業主包的，而且俾人住殘哂先用唻結婚都要俾錢落去執番好間屋啦，不如自己住啦。

就係咁，租唔成 (我們是好易被人地意見影响的人 !! HEHE.....)，自己住，咁.............就冇咗"一年死約" 的限制了，2009咁好年，不如.............就今年啦。

再找同一個師傅摘日，給我的，便是我一生人中的重要日子，2009年、9月、21日。

9個月的籌備時間，真係未試過咁忙，婚紗展、金巴利道、金都、百利、上海街.........呢D地方一個月出出入入幾次。

搵酒席-------------碰壁、再搵、搵倒、落訂。

影結婚相----------揀衫、影相、揀相、收相。

試晚裝------------揀衫、HOLD衫、轉衫、FIRM衫。

試妝---------------揀人、試妝、REJECT、再揀、再試......N次後，CONFIRM。

新屋傢俬----------邊揀邊買，買足9個月。

阿媽著對咩鞋、家姐阿妹著乜衫、阿爸造西裝、奶奶戴咩首飾.............唔知點解，佢地都要我參予在其中。哈哈...........回想起來，原來忙咗咁多嘢。

過大禮、上頭用品、安床用品.........都買齊了。

BIG DAY RUNDOWN 又寫好，明天還相約哂 20個兄弟姊妹第一次GATHERING。

 

一日一日咁過，現在，剩下30天。心情是輕鬆的，因為D嘢好似忙完了。但不自覺地昨晚又發了一個惡夢.............是否無形的緊張及壓力又漸漸地湧現呢?

尚餘只30天的 "單身" 生涯，是否應好好享受?

哈哈~~ 約番D損友出去蒲番幾晚先......