36周.........4 weeks to goal!

今天，BB已經滿36周大啦!

過多4周就係預產期，陀BB生涯，就快完結了。

由34周開始，我FEEL倒阿仔在肚中的郁動多變化咗，唔係一味踢，有時我會FEEL倒是小手在動，有時佢郁得犀利，我隔著件衫看，好像有隻老鼠在枱布下面走過咁，真係想玩扑傻瓜! 我會拍下佢郁的部位，同佢玩，佢好似FEEL倒有隻手頂番住佢，佢又再用力D咁，我覺得我真係有同佢溝通緊，第三個人唔明架喇。

有時做嘢做到好忙，佢又郁下，我都會輕拍下個肚問佢 "BB做咩呀?"，或者同佢講 "BB自己玩啦媽咪唔得閒呀，乖豬! "，真係好享受。

而家，BB仲係我的一部份，我食咩佢食咩，我瞓覺佢又瞓，我去邊都帶埋佢去。佢郁我又會拍下佢，真係唔捨得失去呢個感覺!

但另一方面又好想快D見倒佢一面，想快D到預產期，但到時呢，佢就再唔係我一部份，佢是獨立個體，嗰種 "二合一" 的感覺就冇咗了。

但我想，真正當成媽媽時，又會是另一番感受! 不同階段嘛。

上周見張醫生，佢話我胎盤已經成熟，BB個頭大咗好多，而家5.5磅出世預計7磅冇走雞，我仲會早產十日八日咁，即係可能預產期變成4月頭。(原來早產的其中因素是胎盤成熟度，我以為BB大嚿、或者食咗寒嘢先會引發早產o添)

我已通知公司4月2日開始產假，咁咪啱啱好囉，超FIT! 如果真係4月頭，就只淨下3周的陀B生涯了。

呢一個禮拜覺得個肚大咗好多，希望BB再長肉D、吸收多D，出到唻有7磅以上就好了。

P.S. 上周從超聲波見倒BB的全貌，仲拍下了VIDEO (因為佢爸爸沒空跟我檢查，但又掛住阿B) ，BB塊面多咗好多肉，個咀仔"妹妹"下咁，真係好想親親佢!! 我一出診所就即看VIDEO一次，到咗今日我都仲係每日要睇一次，係咪個個都係咁? 總覺得自己的BB最可愛! (即使未出世啊!!)