睇住熹熹越來越重，腳仔越來越有力，開始想講嘢。
10月8日，半歲大了。
衫要著80號，二十磅，有三隻牙仔。識得坐，但唔識轉身，可能個身太重佢冇力撐起啦!
前幾天給他吃米糊，第一次食就識得吞，都算叻。人地話開頭只能嘗幾啖，不能多，但衰豬食咗幾啖唔夠，係咁喊!!
慢慢再加d菠菜蓉、紅蘿蔔蓉、南瓜蓉俾佢，接觸下其他食物，佢都肯食。好鐘意香蕉蓉，但唔太like蘋果喎!
by the way......d pupu 真係好臭呀!
食咗固體物後，我抱佢感覺仲重得快咗，真係好聚手! 人地好多兩歲小朋友先得廿二磅，佢而家已經有喇，真係唔知點搞?! 好多朋友送的新冬天衫仔，明明for 6-7個月的，而家攞出來度下，原來唔啱著了!包片片的位置扣唔倒褸，大脾仔又窄得滯，真係浪費哂。
有時，佢撞口神會"媽...." 咁叫，聽倒都真係好窩心! 不過暫時未聽倒佢叫"爸"，嘻嘻~~
而家我會播一些baby song佢聽，佢好鍾意ABC song，扭計仔時唱俾佢聽都會收聲，好神奇!
阿仔的進度我都好滿意，唯一係仲未戒倒夜奶，目前仍然是4-5點倒會喊，要奶奶!而且，不知幾時開始，佢要同我一齊瞓，唔鐘意瞓bb床。三人迫埋一齊，佢在中間，佢又好大汗的，俾張被焗到一身汗，瞓醒張床單上的汗水印成個人型 (佢睡的位置)! 好誇張，唯有天天開冷氣!
呢隻仔真係....俾佢玩死，但又心甘命抵!!
