又是必須紀念的日子!
4月8日，仔仔出世啦!!
張醫生之前推算BB會早一周出世，計落即是6號或7號左右。老公八卦查下，話呢2日出唻都冇咁好，最好係8號打後去到十幾號日子都不錯。我打算順產的，都不由得自己控制。其實我恨不得嗱嗱聲見倒個仔，過咗4月1日後日日都專登做多點踎低起身的動作，會催促BB頭仔向下一點，快開一點。但係，唔知由自可，知道最好8號打後出世，去到6、7號倒都專登唔郁，唔好刺激個肚，等到7號晚9點零鐘，先至重新再做催產動作，踎呀踎呀踎呀........
8號朝早，老公起身返工，我又係冇動靜，繼續瞓。瞓到9點9，諗住起身小便，一坐起個人，嘩!! 倒寫水呀，好多水湧出唻!馬上跑去廁所，褲仔全濕了，呢種就係 '穿水"??
應該係! 心情超勁興奮，諗倒今天應該可以見倒個仔了，又可以經歷十級痛，真係好興奮! 飛快地洗頭沖澡後打俾老公，佢話 "真架?!!! 我而家渣車返唻!!"
換好衫，FINAL CHECK走佬袋，食個麵包頂肚，打俾媽咪話佢知要入院，UPDATE FACEBOOK STATUS，靜靜坐在梳化等老公，不敢動因為D胎水流得好快，一動便一股暖流滲出，人地話穿水要馬上入院否則BB會缺氧又會感染，所以興奮之餘都有少許担心。
10:15老公回家，奶奶都到了，一起去廣華。11:00正式人到產房，瞓上床，都是似曾相識的。1月8日的經歷又想起來了，3個月後，瞓在此床的心情截然不同，梗係啦，BB而家足月啦!! (當時看見隔唻床位的媽媽足哂月咁等開到十度推入手術室，相反自己就努力地減低收縮不讓BB出來，真係好羨慕呢D媽媽!!)
呢個時候，只是穿了水，一點痛都未有，又沒有見紅。姑娘們都表示我有排等! 我打俾老公叫佢回家先。
食完午飯，1點半，突然子宮痛了一下，約數秒。這是第一下宮縮，我計住時，第二下是1:35pm，隔半個鐘，暫時未是規律性的。我趁沒有痛時周圍走動，見到D健身波波，好想坐下! 因為d人話坐多D個波波會開得快D，可以促進BB頭仔落來。我戇居居咁在個波波上彈下彈下，玩到2:30，突然來咗一下痛，呢下都幾金架，令我停低所有動作，不過姑娘話在痛時要堅持繼續 "un"，個頭仔先落得快!! 我都乖乖咁繼續 "un"!
d宮縮開始密，約15分鐘一下了，而且越來越痛! 呢種痛我開始要深呼吸了。玩波波玩到4:30pm，我突然發冷，好凍! 我好驚自己會感親發燒 (朋友就是一路發住燒生仔以至bb都要打抗生素!!)，馬上爬回床上休息，此時宮縮是5分鐘一下了! 是我開始支持不了的痛!
6:00pm，探病時間，我媽咪先來，她帶飯給我我全吃不下，但我知唔食唔得因為錯過咗呢餐便冇嘢食，冇力生仔呢! 唯有爬兩啖咁，點知一下痛楚令我嘔番哂出唻! 真係"痛到嘔"! 我仲語無論次，同媽咪講覺得自己會死响呢度! 即刻俾佢鬧爆咗!!
之後換老公入唻，佢見倒我個痛樣話好無奈，佢完全唔知可以做倒d咩。我處於一個唔想聽、唔想俾人碰的狀態，我叫姑娘check下我開了多少，我已經覺得頂唔住，換唻的是她說我一點沒有開!! 她說痛時，要整個肚覺得硬埋一嚿，好似想疴屎咁，先至係真正的宮縮 (OMG! 我仲未係呢種痛!!!)
我好低落，挨痛唔緊要，如果痛得唻知道子宮口一路開緊、頭仔一路向下的話，都叫有回報。而家呢D假痛，得個挨字! 都冇開!! 仲要挨到幾時呀!!
姑娘仲估我今晚應該不會生的............
媽咪、奶奶仍在產房外，我實在唔想佢地一個一個入唻問候，我一句一句咁答，我叫老公扶我"爬" 出去，我叫佢地走，我唔想再抑制住痛楚好聲好氣咁講嘢，呢個MOMENT我爆爆地了。 (之後我媽見到我咁痛同我奶奶講 "又唔係俾唔起，一早叫你開刀啦，挨咁痛做咩吖，痛到嘢都食唔落........."。我奶奶話冇回應我媽呀，因為佢點都覺得順產對媽媽復原係好D，呢D可能係奶奶同媽媽的分別! 媽媽總是不想看見個女的痛楚多一點)
回到產房，我痛到洩氣了，同老公講 '唔得呀，算啦，打止痛針啦! 而家就打!! 唉，總知開刀"。姑娘話我第一胎，痛得唻又未有屎感，真係今晚都未必生得，咁早、未去到真正好痛就打，真係"SIDE"架，等到好痛但藥力過了就無用啦! 又叫我去坐波!! 佢話唔坐可能再痛耐D，結果又爬回波波度UN了15分鐘。
突然有一下痛，真的是整個肚硬實埋一嚿的，而且有便意! 唔通姑娘就是講呢種?
呢種痛俾起之前的絕對更堅! 加埋屎急感，但姑娘話千萬不要隨著呢個便意而用力PUSH出來，要好似忍屎咁忍番落去，如果唔係子宮會爆口呀!!
真係難度高!! 此刻要我講一句說話都不能了，雙眼反反地，冇意識再理會我老公，淨係間唔時回神時，望下佢對眼，見倒佢好用力咁點一下頭咁支持我。
8:00PM了，姑娘叫老公去食飯，反正我有排都未生得喎。老公出去後，有幾下痛我忍唔自叫了出來，點知俾姑娘鬧，佢話嗌哂D力，不如留番唻生嗰陣用力啦! 嗌都冇人幫倒你啦! 你好痛要叫出唻就呼氣，係咁呼氣啦!!
我聽咗姑娘的教晦，好痛時真係狗仔式咁呼氣，好似真係幫倒下手! 8:20PM倒我叫醫生替我CHECK再下，估不到醫生話 'e.....你開咗4度啦喎!!"
呢個真係強心針!原來呢種痛係堅的，真係屬於 '開嗰種痛"!! 醫生話 "咁突然變得今晚有望生啦喎!!"
8:35pm，老公回來了，我仍舊不能跟他說話，用反白眼唻同佢打招呼，我知佢望實我的 (之後老公話，感覺倒我去咗另一個層次，進入咗自己的世界，冇人可以進入)。醫生同佢講咗我已開4度，他都很是鼓舞!!
持續痛到9:10pm，我嗰種屎急感實在忍唔倒了，我係咁講 "我真係生得架啦...........!!" ，我真係feel倒有嘢要出唻啦!!
醫生叫我唻緊的一下痛，不用忍，用哂力咁疴出唻，去要睇下係咪真係生得。我照做，醫生話 "開哂啦! 真係生得啦喎，包你10:00pm前生出唻好冇?"
真係好大的鼓舞!!
我被送入手術室，老公隨行。入到去，是一個做戲見過的情景。姑娘叫我唔好"咇" 阿b出唻住，佢地未整好個架部，我忍得好苦 (你試下疴屎，便便去到門口要出唻但你仲要忍住因為條褲卡住咗除唔低，嗰種忍法再加上劇痛，就是這個滋味)。
9:30pm，set up好了，姑娘話隨時push得，用力生啦!! 來啦!!!!!!
先要push個頭仔出唻，姑娘話bb在產道了，你唔快點用力bb就唻窒息，心跳弱緊啦! 係咁恐嚇我，我都真係驚架，頂硬上!!
姑娘話我好夠力，可以唔剪 (會陰)，bb個頭仔都應該出倒唻。下一次痛，姑娘話必須成功推倒頭仔出來!
痛了，用力push...................一下唔得，兩下............用力......................一絲撕裂的痛，應該係會陰撕裂，不過唔太緊要的，bb頭仔出咗唻了。
再來，個身出埋唻就可以啦! 我用了一生人都未試過咁樣谷出的一道力氣，push push push.........................一下..........兩下.................三下......eeeerrrrrrr!!
感到有東西一下子滑出來，肚子變平，痛感即刻冇了............由十級痛突然完全唔痛。姑娘抽起一團血肉、連著臍帶的東西.....舉起給我看，對我說 "出咗唻啦，生咗喇!!"
bb出世啦!!!! 9:39pm，3.1KG。
我見倒bb成身滑潺潺的，被姑娘抱去抹身磅重了，過咗一陣，哇哇聲的，佢第一次喊喇!!!
好感動呀! 我左眼流左行眼淚出唻 (但右眼冇喎?!)，望住老公，佢冇喊呀，不過好用力咁點咗頭一下。
過咗一陣，姑娘抱咗bb過唻放在我胸口上，話等bb聞下媽媽聽番媽媽心跳聲安定下，順便叫佢啜下媽媽，練習飲母乳，不過佢都係未識啜呀。我看著bb，佢好攰呀! 眼仔有時都會開，望下媽咪，好快又合番埋。好可愛!
這個陪我十個月的寶寶，五分鐘前在肚中，五分鐘後在心口，暖暖的，和我有著骨肉相連的關係。我唔係好敢摸佢，好似好脆弱，我怕整親佢呀。我抱了10分鐘，姑娘又抱走咗去打針。
之後姑娘替我聯針，會陰不用剪但自己撕裂咗少許，而家的傷口相比要剪的話約只有三分一，真係好! (不過聯針都好痛!!)
9:45am穿水至到9:39pm生了，真的很值得回味的12小時，呢種痛，會令人一世都記得，不過又未去到頂唔順的程度。話說回來，我覺得十分最痛的話有8分，我覺得俾火燒係咪會痛d呢?
老公讚我好勇敢同叻叻呀! 冇打止痛針，冇笑氣都頂倒，冇食飯又夠力氣，而且從未開到開哂十度用咗2個零鐘，un波波真係幾work!
我最開心係唔使剪，會復原得快好多架!
11:30pm我被推了去產後病房，老公要離開啦，佢其實同我一樣應該既開心又攰到爆了，叫佢D早回家瞓覺，結果我見佢點幾鐘都仲update facebook status向所有親友報喜，哈哈!
12:30am姑娘推bb俾我叫我學餵奶，bb有啜呀!!! 不過應該啜唔倒嘢的，都未上奶。但呢種親子的感覺真係好強，好有媽媽feel!
BB，I LOVE YOU!!!! WELCOME TO THIS WORLD! WELCOME TO BE MY SON!!
