入院前，130磅，出咗院，123磅，一個月後，都仲係123磅......唔知點解呢。不過上周去見張國良，佢話BB有重到，入院前約2磅幾而家有3磅幾，咁輕落自己度就冇所謂啦!
出咗院後都待在家成個星期先返番工，同TEAM去咗HONEYMOON的女同事回來了，佢就慘，一心諗住去咗HONEYMOON果個星期的工作我會幫佢跟哂，點知回來後發現我冇跟不等止，我的工作呢個禮拜佢要幫我跟番!!
但我最近收到風， 原來佢都啱啱有咗，6周了，而且因為工作太操勞，作小產呀! 都有臥床休養但佢都成日返公司做嘢，怕D工作會甩! 我希望佢冇事啦! 呢間公司的工作真是不適合大肚婆，太急太操勞了。
而家雖然冇咩事了，但試過去超市買嘢，一時貪心買多咗，拎重咗，回到家個肚都即刻硬硬地，所以我都好小心，咩重嘢都唔拎，搬搬抬抬的家務都唔做了，盡量少d行街，呢排個肚真係硬少咗。得閒又成日提住bb，"你冇咁快出唻架，陪媽咪多一陣，4月先好出唻呀" 咁，我希望bb足月出世呀!
BB 31周了，我同老公呢幾個周末都有去行吉之島，要預備BB出世後的日用品，沖涼同換片嘢啦(棉球、棉片、棉棒、BB沐浴液、浴盤.....)、食奶奶的用品(奶樽、奶粉格、消毒煲、bb食具洗滌劑、洗奶樽擦.....)、bb衫仔啦(底同面的和尚袍、包被、睡袋、帽仔手套仔、BB洗衣液...)、bb車啦、床仔啦、床上套裝啦、揹帶啦，仲有媽咪走佬袋的用品(產婦衛生巾、網褲、傷口清洗瓶、收腹帶、坐月水泡、BB尿片、濕紙巾....)等等，分批買咗幾個禮拜都係仲有嘢買漏的!! 真係好 "濕星"!!!!
細細件唔講，大大件的:
BB車----一大一小 (重D的較穩陣，東叔叔送。輕D的方便，我中學的AUNTIE們送，兩架都係COMBI)
BB床---有一張C-MAX，老公同事送的，但要買多張，因為奶奶日間睇住BB，晚上我自己湊番。想買多一張LA BABY或者 0/3，這張將會是奶奶送的。
BB籃---已有一個CHICCO的，石仔叔叔送。
搖搖椅、網床---又係朋友送的，不過未啱用。
揹帶---將會是婆婆，即我媽咪送，但未睇啱!
好彩有一部份的用品，好友june替我淘寶搞掂了，如紗巾、餵奶U字枕、換片尿墊等等.....又平又實際!!
來緊的週末，要去K.O.埋揹帶、另一張BB床、床上套裝(好想要1set PETER RABBIT，不過好貴呀千幾蚊!!一套抵兩套)、小型暖爐(沖涼要開住)、同媽媽袋中的收腹帶、肚紋膏，咁我真係買好九成嘢了!!
