2013-1-8，永遠難忘記。
我同BB過左驚心動魄的一夜。
從得知有了小寶寶到肚子已達26周零4天，懷孕過程都是順利而沒有一點不適的我，實在想唔到，這天無拉拉會入院了，差點兒，寶寶就要提早來到這裡！
早上，肚子有點緊實，纖維瘤位置硬起了，我同阿B講，＂唔好踢媽咪個瘤瘤啦，佢唔係波呀！＂，行起路來有點痛，是頂得住的程度。
下午，痛感加強，行路都要就住，同事叫我要小心，不如睇醫生，但同我一team的果個女仔現正婚假中，得我一個仲要頂埋佢果份，老闆又好著緊捉住我係咁chur，因為來緊幾日好多大會要開！最慘係果d客唔係我跟開，我無從入手！心情好趕，好急。個肚又痛......
4：30，頂唔順，個肚實在太實，瘤的位置超痛，好驚，bb你點呀？打去張國良度，姑娘話冇位，叫我第二日12點再去，我好唔放心，我叫佢＂你去問醫生睇唔睇我啦，我而家好痛，我有咩事咁點？＂，結果姑娘都冇問醫生，佢都唔敢亂來，叫我睇最後。
5：30離開公司，行去地鐵站，一步一痛，我心知好唔尋常，但冇得猶豫，加快上地鐵。
7：30老公趕緊來診所，我知子宮收縮緊，好密，個心好亂，咁密的宮縮，bb會迫出來，我得6個月肚咋! 約 8：00點，老公來到，一見佢，我忍唔住哭了。
老公叫姑娘打尖俾我見醫生先，姑娘望到我咁，佢都即刻叫我入去。
醫生按我肚，實的的，佢話確實係宮縮緊，而且好密，2分鐘收一下，怕我早產，一定要入院，寫紙俾我入廣華，直接要入產房，也不用排急症。
我好驚好驚，我知老公都好擔心，但都表現鎮定，佢唔可以俾我感到冇依靠。
9：00，到廣華，辦手續入左產房，老公唔入得，只能站門外但不敢走，這時我在產房中，吊了鹽水、駁住量血壓機、度住子宮收縮的波幅，好似心電圖咁畫出來，d peak 真係好密，姑娘問我有冇食左d好涼既嘢，而家已收縮得像要生的密度！
幸好是，我子宮沒有開，沒有穿水及見紅，但再係咁落去，bb就會迫向下要出來，bb的頭仔又剛巧向下。姑娘話，食藥，希望能抑制收縮，同時要打強肺針，touch wood BB真要出世，個肺都強d，識呼吸。呢刻，我確實好擔心！
姑娘打了一針後，說療程要打2針先夠，但要24小時才可再打，即是我要努力令宮縮減少，至少捱到第2針打完。而家，冇嘢做倒了，因為收縮是阻不了的，藥只是替我降血壓，減少刺激，但不直接幫倒件事。我只能休息看看會否鬆番d。
11：00，老公仲响出面等緊，我借姑娘電話叫佢回家先，我話我食左藥又打左針，有醫生睇住ok喇，佢話佢上網睇左些資料，即使26周bb出世，都好ok架喇叫我唔使咁擔心。我知佢安慰我啫，我點會唔知26周bb有咩不足吖。但我知道現在我倆都要互相支持，我話＂我唔擔心呀，有醫生在，姑娘好好，你放心啦，去食d嘢，回家訓啦，有咩打俾你。＂
身在產房，隔來的全是就生的孕媽媽，個個嗌到死去活來，訓唔著。躺在床上，左手鹽水樽，右手血壓機，肚子上量住收縮波幅的數據，動彈不得，入不了睡，眼光光，我同bb講，你乖乖，唔關你事架，佢有佢收縮，你唔使理佢架，你同媽媽一齊加油呀，聽日冇事架喇。
鹽水已吊了5瓶，血壓機每半小時自動量度一次，因為食左藥，血壓變得好低，姑娘都唔知好冇讓我繼續食，血壓太低都怕我暈同頭痛。但我情願食藥，總知我要個肚唔再縮，暈咪暈囉反正在床上。醫生都係認為要先考慮宮縮，所以交帶姑娘點都要俾我食。
朦朦朧朧，訓下醒下之間，在我旁邊已經換過2、3個孕媽媽了，每個都嗌到子宮開到7度先推入產房。佢地真係幸運，BB去到足哂月咁自然生產，但願我也是。
第二朝7:00，姑娘叫醒我，要聽BB心跳，好彩BB並無異常。姑娘看過子宮收縮紀綠，話好似好番D了，d peak冇咁密，收縮幅度沒昨晚嚴重，叫我繼續加油! 我借了電話打給老公，我話好番好多，令佢放心，我知佢雖然自己在家，一定好担心，一路等住我電話報平安。佢已經同我媽咪和奶奶講咗我住院了，佢地下晝會唻探我，我諗都嚇死佢地了。
食藥唔使咁密了，變成4個鐘一次，但血壓仍然低，好彩我冇乜唔舒服。老公問我使唔使執定走佬袋，佢已經RESEARCH了要執什麼，我叫佢唔好，我唔想做好預備"阿B會出世咁"。只叫佢執點日用品給我。
1:00，我終於不用禁食，已冇食嘢24小時，好肚餓! 媽咪先到，見我吃醫院的簡單飯菜都吃得狼吞虎嚥，鬧我做咩唔通知佢可以食嘢了帶飯給我。我都係啱啱先解禁咋。(之後我妹話我媽回家後話俾佢地知我食醫院嘢食到照哂鏡咁，覺得我好陰公喎)
呢一日我肚都冇再收縮，不過瘤瘤位置昨日硬得太耐，今天仍然痛。晚上成功打完第二針強肺針，我問姑娘明天是否可出院，姑娘話食藥要吃足48小時，所以要等到明晚11:00吃完，即後天才可以走 (如果冇事的話)。
第三天，瘤瘤痛都退埋，今天精精神神的，我諗晚上吃埋最後的藥，就冇事喇。晚上冇嘢做，坐响度睇咗2個幾鐘電視，11:00食埋藥打算訓覺，個瘤又突然變硬佢肚因而又收縮左一下，力度仲唔低!
我又緊張起來，因為呢個感覺正正係前幾天開始宮縮前的情況，我好驚佢又再惡化下去，又唻過!!!!!!!
姑娘話藥唔可以再食喇，而且只是又開始縮幾下而已，叫我放鬆啦訓覺啦，訓覺都好有幫助的。我帶住少少恐懼入睡，又同BB講，冇嘢呀，唔好理佢，媽媽而家訓，你都訓啦，我地對抗佢啦!
第二朝 (第四日了)，收縮好似又退了，不過咁反覆，我已經唔敢再咁大動作同埋坐咁耐，靜靜躺著，醫生唻到，看了所有報告，都是批准了我出院。我開心地通知老公同媽咪，過了2個鐘接我走了。
醫院埋單，$350蚊，嘩好平呀! 如果我唔係香港人，要成八千幾蚊架。突然覺得交稅交得好抵!
綜合咗呢幾日的經歷:
-不能令自己有壓力，急進，緊張! 尤其工作上。
-出現收縮情況一定要訓同躺，坐都唔係咁好。
-政府醫院的待遇其實都好好，而家我都考慮日後生是否可以考慮番廣華。
-老公都同樣担心自己同BB，不要對佢發洩，要互相支持!
-屋企人支持同樣好緊要，世上只有媽媽好!
BB，你是4月之星呀，未夠鐘就待在媽媽肚子裡陪伴我多幾個月啦!
)
