生日天 + BB結構全面體

期待了數周，今天既是生日，也是BB照結構的大日子。

人地話，照結構、4D呢d，會好清楚見得到bb個樣架，真係唔知佢咩樣，似我定爸爸多d呢? 不過佢係仔，係爸爸好d，爸爸靚仔嘛!

11:30am到達，等左半個鐘倒入房，坐在能調節角度的椅子上，面對一個大電視，bb就快在畫面出現了。

塗上啫喱 (好細心呀，呢間診所的啫喱是溫熱的!!)，醫生用探頭在肚皮上碌兩碌，BB大特寫出現了!

第一個畫面，BB刚刚在打喊露啊! 小咀在動，我問醫生 "咁樣佢咪飲了羊水囉?"，醫生話 "BB日日都會飲自己D尿架啦!"。

原來羊水係BB的小便...........

醫生好細心地 "數" 佢要睇得倒的器官，呢個腎、肺、胃、心臟啦...........XX!!$#%#.......我照舊睇唔出。淨係識得認到眼耳口鼻、手指仔腳板等等。

醫生來了一個腳板仔大特寫，我刻意讓他停留片刻等老公影下來。

然後看寶寶的樣子，醫生說5個多月大的胎兒，其實只有皮和骨，沒有很多的肉及脂肪，所以看起來很 "瘦"，按個摯，電腦會模擬地加些肉上去，讓心急爸媽也有機會一睹小寶寶容貌。

映像一出，嘩!!

點解個鼻同個咀可以咁爸爸架?!! 激似!!! 一d我o既影子都沒有?!

我睇見佢老豆開心到.............d笑容真係收唔埋，哈哈!!

不過有樣嘢我聽後覺得自己對不起BB，就係我子宮有不少纖維瘤，這是一懷上寶寶才發現的，寶寶一路大個瘤都會大，咁樣，就會同BB "爭位"，因為子宮空間細咗嘛。

見倒BB映像時，BB是成個人摺埋的，即是對腳伸直放在頭頂，好似膝頭要貼住個鼻咁樣。

醫生話 "係呀，少位嘛，佢咪摺埋囉.........." (哎呀，聽完個心好 "UP"，BB對唔住呀!!)

我問 "會唔會一直都摺埋架? 咁咪好辛苦囉?!"，醫生話都唔會o既，佢唔舒服都會自己郁下的。

離開診所，醫生送我們一隻光碟，刚才照下的相及video都有!!!

好好的生日禮物!!

今日過生日，有bb陪住，一家三口的，過得簡簡單單但都好滿足，尤其成日返睇bb小腳板的相!!

希望12月20日去見張國良，再照bb時，會見倒佢唔再玩瑜伽，對腳放返落唻啦。

小小腳板 

個鼻真係好似呀!!!

我個仔啊........踢我了!!

都差不多5個月啦，人地話，4個零月便會有感覺了，點解我冇FEEL架...............

BB都冇踢過我o既.............

定係我真係唔識分呢? 人地話，唔好想像係好大力，只係個肚好似攪風咁， "了一了"!

今日，老公又未返，我自己焗豬扒飯食，唔知係咪忙咗一輪，坐低開始吃時都9點幾了，係咪餓親個仔呢? 食咗兩啖，個肚跳下咷下咁。

咁怪o既，扯高件衫望下個肚........

哎呀! 個肚跳咗一下喎!! 真係有嘢响入面隊出來咁架!!

立即攞部手機，嘗試錄低佢，錄咗4段，都未捕捉倒，到第5段，等到第18秒，終於影到啦!!

whatsapp俾老公睇，佢話 "咁就係踢嗱?!"

佢話佢好羨慕我，因為我成日同佢講陀住bb真係有一種好奇妙的感覺，好難形容，嗰種 "在一起" 的感覺，有d "我開心bb就開心" 的感覺，好有母性! 加上我話bb踢我真係好得意，佢叫我形容佢聽我又形容唔倒，佢話佢好想感受下，但冇法子感受!!

我話第日bb動作大d，我就叫佢摸住個肚肚到時就有feel啦!

首次到廣華產檢

前幾天去了廣華，終於都第一次產檢了。真係! 個肚都4個幾月大了!

今日特別緊張三星期前抽了血做的唐氐綜合症風險評估的結果，希望冇事啦，之前度唔倒頸皮我一路都忐忐忑忑咁。

距離上個月17號到至今，個肚又冇乜動靜了，我又係繼續冇任何害喜徵狀，BB又未識得踢我住，我又試有番開頭 "羅羅孿" 唔知BB有冇健康長大中的不安同担心。

一去到，先做量血壓、度高磅重、驗小便 (要自去帶定去)、抽血，再等了約45分鐘，入房見醫生 (定係姑娘，我唔識分)。

醫生第一句便說， "放心啦! 患唐氐綜合症的風險屬於低"，即刻開心哂!!

之後做按乳房檢查，同聽bb心跳! 噢!!! 乜有得聽架? 我都唔知o添，之前在張醫生度問過佢，佢話佢冇呢部機，我以我未聽過，人地話好似跑馬咁，噗噗噗噗跳得好快架。

姑娘在我肚上塗啫喱 (次次都凍一凍 -.-)，把探頭在肚皮上搓了搓，噗噗噗噗噗噗噗噗............聽見了，真係好快呀，好似跑馬呀，哎呀，好窩心 

老公在布簾外等著，出到來我問佢是否也聽見，佢話有聽倒，都一樣覺得感覺好特別。

我BB正在正正常常地生長中啊!! 比起在超聲波見倒BB果份感覺，聽心跳更加震撼，有心連心的感覺，呢個月的忐忑又一下子沒有了!

馬上將喜悅寫上FACEBOOK，順便告知朋友我懷孕了，得到很多祝福啊!

當天下午，見埋張醫生 (之前專登就埋同一日費事攞咁多假嘛，唔係又俾公司照肺了)，又從超聲波中看見BB，老公上個月唔得閒陪我，佢已經2個月冇見BB了，所以佢今次別期待啊，專登叫醫生搵番 "姑姑仔" 位置等佢望下!!

醫生說就快可以照結構了，到時更清楚見倒BB個樣，唔知是否似我?! 不過要到別的診所照，他這裡沒有，給我轉介。

走前問醫生，BB踢我是什麼感覺的? 等我好預備一下，以等佢第日踢我我就知這種是 "踢"!

醫生話.................................................

我又唔係女人，我又未陀過仔，我點知呀! 你第日話番俾我知囉!!

哎呀!! 佢啱，輸咗!!

離開診所，打電話去BOOK 照結構，結果排到12月8日。

是我的生日呢!!

那天在4D下見到BB，最好的生日禮物!!

受不了!! 做咩迫我返大陸!

我受不了啊!!

噚日已經為咗我放產檢假照我肺，今日無拉拉又捉咗我入房，為咗 "有咗之後冇返大陸" 又照肺!! 佢都痴線架!!!!!

阿秘書小姐今日又好無奈咁同我傾計了 (唉，我都知佢唔想o既)，佢話 "公司都想了解番喎，你未有之前成日都返大陸，而家有咗就未見你返啦，咁其實會唔會影响到工作呢? 公司都想同事明白，始終應該係公司利益行先o既，如果遇上d重要嘢係最好返大陸去解決的話，都想同事考慮番公司立場都會返去囉，同埋公司唔想話做出咗個榜樣係，大肚就一定可以唔返大陸呢個先例，所以你而家可唔可以答倒我，其實一旦遇倒d 非返去解決不可的情況，你都係好樂意返去架?"

我答佢 "我梗係唔可以答你啦，呢個絕對唔係我意願，你都唔可以扭曲我o既意願，對唔住我目前唔係公司行先，我一定係自己行先，自己身體狀況係我首要考慮，呢樣嘢我都費事呃你了，我so far咁耐冇再返大陸，我唔見得工作上有d咩影响咗同埋唔順利，我又真係未遇到d "如非必要"的情況"。

秘書小姐 "但係你刚上班真係成日返個喎，咁即係你的工作真係要成日返去先做倒啦! 而家唔返喇老板的担心都係有的"。

我話 "講真我唔認為我刚上班時係因為d嘢一定要上去先做倒而返，我係 "算啦唔同公司計咁多、蝕底d啦" 的心態返去，幫公司拍爛檔頂咗咁多個禮拜，你而家反而抽我後腳? 反而當係話柄話番我?? 我真係接受唔倒喎! 咩嘢事情係 "非上去解決不可"? 我可以答其實唔會有，咩事情總是都可以解決，你見我而家個肚三個幾月，都冇返去咁耐，間公司有冇被我影响咗半分? 其實老實講就係，响老板立場，咩嘢事情都係非上去解決不可的，佢都希望同事日日都响大陸o添，响我立場就事嘢解決唔唻的，根本就係觀點問題，公司就梗係希望員工唔理自己死活咁付出啦。不過我而家o既situation真係做唔到囉，真係sorry喇，你可以照我頭先番話同老板講，我唔mind o家!"

秘書小姐 "哎呀唔係呀，你咪成日都咁負面啦，唔好影响自己心情呀!! 公司真係唔係咁諗o家! 都係想員工要記得公司利益行先o家咋。一係咁啦，頭三個月就要小心d，就唻生兩個月當然都不能走動啦，中間呢段時間，會唔會公司想你上去，你都係好願意呢? 我可唔可以咁答老板呀??"

(火都來) 我話: "梗係唔可以啦! 我都話我而家一定自己行先，bb行先，如果到咗情非得意，我自己都覺得唔上去搞就死梗，而我醫生話我冇問題可以返大陸，我會認真考慮囉，但我點可以答你我好願意咁啫! 返一返上去，係咁 "don"長途車4粒幾鐘，夜晚又叫天不應咁，人生路不熟咁，我真係touch wood有咩事，你地都唔安落啦! 而家唔係即日來回深圳呀! 都要考慮下我處境o家!!"

秘書小姐: "....................唔..........都好清楚你立場o家啦，好啦，我會同番公司講，不過你都真係唔好誤會咗公司呀，公司都好開心你有bb....o家，xxxyy??@@%@%$%................." (我都聽唔入腦了)

好唔開心，覺得公司好冇人情味，夜晚同d 姊妹食飯，同佢地講，佢地話其實公司係唔可以咁樣捉住d員工迫佢地返大陸同阻止放產假，會造成我心理受壓，係歧視唻! 下次如果佢地再捉住我洗腦，我可以話 "對唔住我覺得公司而家咁樣對我唔公平，我要開始錄音，保障番自己，日後有咩事都係証據"，你公司就一定唔會再搞咁多嘢的了。

好，下次一定要咁做，反抗下等佢地知都好!!

產檢有罪嗎?!!

心情真係極之咁唔舒坦!!

上星期三因為入廣華度頸皮，噚日又去咗張國良度產檢，連續兩個星期都有一日請咗假，今日竟然俾公司照我肺!!

嘩，我真係諗都冇諗過公司會咁樣! 我又唔係扮病請假，都有足証明書，點解要話我!!

今日，老闆派咗佢秘書無拉拉同我入哂房咁傾計，一開頭假到死咁，話公司知道你有咗bb呀，當然係好戥你高興啦.........

"不過，睇番你上個星期同今個星期都有一日去咗產檢喎，我都明白好多人都專登會政府同私家兩邊睇，不過公司有公司立場，都係公司利益同工作效率放首位o既，你咁樣請假，對其他同事好唔公平喎，人地又要做埋你d嘢，而且俾其他同事見倒第二日有咗bb又會有樣學樣咁，其實你會唔會可以都就埋同一日呢? 或者浄係請半日，或者攞幾個鐘頭睇完都返唻公司?"

我火都起呀! 我答返佢，點解我從來都唔知道，我請咗假會有其他同事替我做埋我果d工作o既，又唔係我自己一個人做番! 我同秘書講，"乜老細咁大誤會呀?! 如果佢以為會係咁而做成其他同事唔公平，你幫我答佢一句，"係就好咯!"，有人會咁好你做埋d嘢就好咯!"，仲有，你自己都生過，大佬，去醫院、醫生度等，閒閒地都等兩粒鐘，你估我去玩、偷懶呀，即使係真係半日就睇完，我話哂都真係有醫生証明，又唔係偷又唔係搶，點解唔可以請足一日先?!

我今個月先至第一次廣華，同埋度頸皮係fix咗要响特定邊幾個禮拜做家嘛，我點樣就時間呢? 私家醫生產檢响呢個時候都係一個月先睇得一次，唔通我就番政府果度，變咗兩個或者三個禮拜就睇咩，私家醫生一個月照一次bb已經係好難等待 (個心好期待家嘛)，同埋咁疏，本身我恨不得兩個禮拜都去一次o添呀。

其實我昨天睇完張醫生，知道下個月大約係11月15號再去，而廣華就係13號上午，我都同姑娘講咗我想13號下午唻，比原先早2日，姑娘都ok。因為我自己都唔係太想影响工作，始終未做的都等著你回去做，我雖然有咗但晚晚都OT 2個鐘做多D嘢。唔返一日，第二日回來OT得仲多先補得番呀! 所以好嬲囉我一番苦心無人知，仲搶先俾公司開聲叫我要多關注請假事情以免影响工作影响埋同事做埋你果份!!!

不過我費事秘書小姐難做，我都同佢講，"你放心，我自己都驚工作做唔哂，所以下個月我已經自己合併咗2個產檢了，不過，你大可以睇番D紀錄，我邊日唔係做到7點半先走? 我問心真係 "自己的事自己做"，邊有人咁好會幫我? 如果我日日都5:30pm放工即閃，就話我黑鬼人憎啫!! 請嗰一日半日假，使唔使專登照我肺話我唔考慮公司利益? 做咩針對我大肚? 我請了假，同其他同事突然病咗攞兩日假有咩分別?點解係發生响我度就影响人，如果我請的是感冒病假就冇事先?"

秘書小姐咪話囉 "你唔好誤會呀，老闆確實冇咁o既意思o家，只係佢可能以為你冇返工果日會有第二個同事頂你的工作，咁好似唔公平咁啫"，我同佢講，"都係果句，你叫佢放心啦，我從來都唔知會咁好，你唔返會有人幫你做咗你果囉，佢唔信的話你叫自己唻同我講啦，等我解釋佢聽"。

秘書小姐話 "哎呀唔係呀，真係冇呢個意思，你唔好激親自己呀!"。

我自己係因為，而家唔方便返大陸，又一個月有一兩日要請假檢查，個心都唔係咁安落所以每晚都加班，做得幾多得幾多，叫做彌補番啦，唉，真係冇人會睇得倒，只要你請一日假，你就係罪人!!! 老細都係一個只會看自己利益的人!!

嬲咗一個下晏，一放工望下個天，算啦! 嬲倒自己就無謂，摸下個肚同阿仔講叫佢都唔好嬲，又回家去了........

張醫生第二次產檢, 男女揭盅!!

上周去完廣華，不愉快經歷後，今天又去見bb了，是私家醫生第二次的產檢。

同事話，佢陀到第十周就知男女了，今天我第十四周半，唔知見唔見倒?

今日係媽咪陪我去，老公唔得閒，上午10:30am的appointment我9:50am就到了，唔想等嘛，果然我排了第一個睇。

一照，又見bb啦，醫生話佢大咗了啊，一個月前佢整體長3.85cm，今天看淨係頭仔都3.7cm了。我同醫生講咗度唔倒頸皮，佢話唔緊要啦驗血都有7-8成準o既，度埋頸皮就9成囉，第二時到了20周照結構，有冇問題都會睇倒的。

醫生看bb，說有兩隻眼仔啦，兩片咀唇啦，冇兔唇，又大腿骨小腿骨咁，自然地我又係唔識睇啦! 不過我見倒媽咪望住個mon，個樣好開心!

關鍵問題， "醫生，仔定囡呀?"

醫生話睇唔倒，佢兩隻腳夾住咗啊

我話: 你咁架! 成日都收埋收埋，咁怕羞做咩喎!!

估唔倒，過咗十秒倒，佢撐開咗兩隻腳仔啊! (示威?!)

醫生話: 咦?! 姑姑呀姑姑仔喎!!

我: 咩呀?! 咩姑姑呀? 仔呀????

醫生: 有姑姑仲唔係仔係咩!!!

我媽好高興呀!!因為佢有4個女，兩個家姐都分別生了個女，成屋女，佢話佢好想湊下孫仔!

我都開心o既，但我期待囡囡多d，不過都一樣愛錫佢。

離開診所，老公打唻，我同佢講咗啦，佢超開心呀，佢想係仔仔，佢成日話見倒個朋友抱住個仔，個仔會眼定定咁望住個老豆好似好信任個老豆咁，佢好羨慕喎!

傻瓜唻o既，就算係囡你抱住佢佢又望住你，你都會覺得個女好信任你架啦，一定要係仔先會咩!

阿仔阿仔，你要乖呀，快d郁啦!

不開心的度頸皮篇!

自從9月19日在張醫生嗰度在超聲波見倒BB同我SAY HI後，一直好掛住佢呀，等咗三個禮拜後的10月10日，是我到廣華為BB度頸皮的日子，好期待再見下BB大咗幾多? 而家點樣呢?

到咗醫院，好多人啊! 我座在房中睇住介紹 "如何檢查BB患唐氏綜合症"的風險o既呢條片，睇住佢repeat又repeat，等咗我兩粒幾鐘，終於入房照了。

bb大咗好多，有7.8cm了，不過問題係佢 "大得滯"!!

姑娘話: 你個bb咁大o既，而家照唔倒頸皮喎，大過咗規定果個尺寸了，條bar拉唔倒咁長.....你而家十三周第五日，咁 "敏" 先唻o既?!

我話: ......................!! 係廣華8月果陣安排我呢日架喎，當時佢都知我到咗今日係第幾周啦。

姑娘話: ................咁你個私家醫生冇提你好敏水咩?

我話: (唉!) 咁係你地醫院自己安排家嘛，關我私家醫生咩事呢? (佢都多餘o既!!)

姑娘: (兜唔倒了) 咁..........我地都冇錯架，規定係十周至十三周六日之內要度，你而家係十三周第五日............................ (仲唔肯認係自己人失當!)

總知，最後就度唔倒啦，要靠十六周去驗血，看看患症指數有多高。不過，單靠驗血冇咁準，度頸皮+驗血有8-9成準，淨係驗血得6-7成，我唔係好安落。

但都冇計啦唔通頼死唔走咩。book咗兩周後再返唻抽血囉。

離開個心真係耿耿於懷，仲頭痛得好厲害，可能心情影响，我同媽咪講咗，佢話算啦我以前都冇得驗啦咁又係咁，放開d啦。

唯有係咁囉.................

下周去張國良度第二次產檢，到時問下佢意見先。

第一次產檢，見倒小寶寶啦

 

等足一個月，終於都等到第一次產檢的日子了。

呢個月真係好難等，陀BB一點感覺、不適都沒有，令我萬分擔心胎兒在肚中是否正常生長中......

未在超波見過BB一面，我忐忑不安，都唔敢講俾媽咪知住，怕萬一...........真係一場歡喜一場空。

等到9月19日，約好了12:00PM見張醫生，準時上到去，人超多! 登記後，姑娘叫我地去食嘢，話起碼等兩個鐘喎!! 我問佢 "咁約我12:00係為乜呢?"，佢話 "係為咗要你准時來留低個名架咋............"，真係"啤"一聲。

真係等到差唔多兩點，有得入去啦! 醫生問我，最後一次PERIOD幾時來，計算預產期。我之前為咗確認係咪真係中奬，已經睇過一次醫生，當時醫生話我係2013年4月12日。但我計算過，我而家間公司新入職唔夠三個月就有咗，做滿40周的時間是2013年3月12日，如果公司屈我一定要放前4後6的話，我就不會有有薪產假了。所以，這次我專登同張醫生講遲咗一個禮拜的最後來經時間，咁樣預產期變成出年4月20日，即使佢屈我放前四，我都已入職了40周，產假便有錢。

到最盼望的照超聲波時間，我同肥佬都好緊張呀，預備好相機，第一次見嘛。

醫生塗了啫喱，左碌右碌，我見倒一點的映像，模模糊糊一團東西，我都未確認是BB的頭定身，不過心情已經好澎湃，又感動! 突然間，BB舉高咗一隻手，伸出了小小的五隻手指呀!!!

哎呀! 佢向媽咪同爸爸SAY HI啊!! 過咗幾秒就垂低番隻手了。

雖然呢下應該係咁啱BB的自然肌肉活動，但係，我心頭好暖，好溫馨呀，唔知係咪BB知道媽咪呢個月唻的憂心，專登同我HI HI 話我知佢好好，叫我放鬆D。

醫生話，呢個係頭仔，見倒大腿骨小腿骨，嘩，我真係唔識睇，我同醫生講 '醫生我諗都係得你先識分"。

醫生話BB已經有3.85CM大。佢話 "個BB咁大既? 點會得9周呀，應該10周個喎︳你有冇記錯最後來M 日子呀?"

嘩!! 醫生好犀利呀! 個BB咁細佢都睇得出差一周的分別既?!

我為咗有薪產假，就繼續扮嘢話冇記錯啦，不過醫生話 '真係點睇都10周啦喎，唔得呀，我都係要寫你的預產期早一個禮拜，出年4月13日啦。"

哈哈，都係唔夠醫生勁!!!! 咁梗係屈服啦。

臨走前預約了一個月後的第二次產檢。10月17日，不過我10月10日會到廣華度頸皮，到時又見倒BB，但都要等3個禮拜啊!

有點可惜係捕捉唔倒BB SAY HI時拍下照片，不過我攞住超聲波相看了很久，依然咁滿足。

當天下午，就講咗俾媽咪同奶奶知呢個好消息了。佢地當然都好開心啦，我都好激動，响電話差D喊添，大肚後真係感性好多，可能HORMONE真係有影响啊!!

心情好抑鬱

心情好低落呀!

有咗BB，係好開心，但都有D憂心。

憂心緊份工，而家剛9月頭，我係9月12日先做满3個月，REVIEW睇下可否過試用期，但我已經連續兩個禮拜冇返汕頭啦。

雖然工作上確係有D嘢應該返去跟進，但要搭成4個鐘頭車，上面食嘢雖然好食但又唔健康，我真係唔想做D影响到BB o既事呀。

唔返上去，影响咗工作，我怕到咗12號老闆同我review 我會過唔倒probation，要extend，咁個肚越唻越大，我行為又越唻越明顯 "小心"，到時俾老闆發現隨時搵個借口就唔要我啦。

問題係，同我一team嗰個女仔，咪話佢好鐘意上去o既，真係每個禮拜都上架! 冇一日响香港架! 因為我新，工作都係佢接到後pass俾我的，有幾多嘢做佢又會知喎，我係咪响香港其實好得閒，佢都知，但我唔上去佢當然係唔會迫我啦，亦都迫唔倒我，只有老闆先迫倒之嘛。

但我咁大個人，老闆都唔會開口話 "你好上去啦喎!" 咁，只要工作你在香港搞得掂，佢都唔會主動要求我上大陸。工作又點會搞唔掂吖，係要用幾多時間咁解啫。上去就2日搞掂，唔上去在香港remote control就要4日先搞得掂。我咪每日都好努力咁工作，有e-mail即刻覆，俾d quality work佢地見倒，彌補番囉。

所以而家每逢星期一、二就好唔開心同緊張，通常一定係星期一二上去，留到星期五下晝落番唻，咁就工作得充實啦。唔通星期三先去，上得嗰一兩日星期五你又返落唻咩，上去都用咗半日啦，車費都蝕埋架。

幾時先捱到9月12呀，真係好驚老闆同我review，話唔滿意我最近唔肯上大陸呢個表現，要睇下唻緊我上唔上，先考慮俾唔俾我過probation。咁點好呢?!!

我係咪多慮了?

除咗份工，bb的健康我都好擔心，因為我一點懷孕的感覺都沒有!!

一次都冇嘔過，人地話時刻都好眼瞓，我又唔係。食多咗嘢又冇，不過係快肚餓咗囉，佢當然又未會踢我啦，我又不嬲唔係瘦啦，即使係肥左少少都唔知關唔關BB事。究竟佢响唔入面o家? 佢......有冇心跳架? 佢仲係咪日日都有大緊? 我都好憂心。不過我唔想返去第一次照ultra sound果個普通女醫生果度，佢好唔pro呀，之前佢話我6周的bb有1.67cm大，後來我睇咗好多書，根本咁小周數bb冇可能咁大，所以我都冇返去佢度聽心跳。

大丹話唔嘔係福氣，bb錫你，但我情願嘔到七彩，起碼有呢d懷孕反應，反而係話俾我知佢日日都長大中，有hormones影响緊我。而家係咪代表我冇呢d hormone? 點解我冇事o既??

有一晚唔小心反轉咗個人瞓，之後醒咗好驚，我覺得我一定已經壓親佢了，但我又唔知佢而家點，真係有d眼濕濕!

有冇人同我一咁諗過嘢? 係咪好傻呢??

朋友真係太重要喇!

正所謂 "有了小寶寶，搵好醫生要趁早"!

話哂我一d經驗都冇，雖然只有剛剛6周大，我都將呢個秘密分享俾一個朋友，大丹狗知!

因為佢之前做賣藥、而家賣奶粉，成日行街sell 診所，識落一班姑娘及醫生，同埋最緊要佢生過，我記得幫佢接生的醫生又平又好。我梗係要問佢取下經啦。

大丹狗好戥我高興啊，佢係第一個向我講 "恭喜哂" 的人，嘻嘻!!

好多人話，政府私家都要排，經濟條件許可當然對自己好d去私家醫院生啦 (我實在聽過好多朋友在政府醫院的經歷，驚!!)，但政府的設備就好d，touch wood有咩異常情況都係入政府，價錢又唔貴。

政府我後來排咗廣華，不過好變態呀!! 要11月先有第一次產檢睇! 到時都5個月大啦，OMG!! 不過排廣華都係以防萬一，我主力都係想靠個私家醫生。

大丹狗當年看的私家是張國良，經驗好老到，收費真係好優惠，但絕不是平嘢冇好，我8月19日打電話預約時間，姑娘問 "第一 次睇?"，我答係啦，佢話 "排到出年一月喎!"...............

吓.........................!! 簡典線呀...........?!

我都照約咗先啦，再打咗電話俾阿狗話佢知，佢聽倒後話我問下喎。

過咗一陣佢又打唻，話幫我搞掂咗呀!! 可以在一個月後、9月19日就有得睇啦!! 是關佢同個姑娘好熟!幫我插咗個位，嘻嘻!!

跟阿張醫生，我日後係一定要在法國醫院生的，都好，好近我家。

9月19應該係10周半了，9月21日係結婚三周年，預先見倒BB真係好喇，真係一份好好的禮物，我好期待呀!!

1st Ultra Sound....

因為剛剛在汕頭回來，被同房的同事傳染了咳嗽，令我都咳足幾晚! 剛發現有了小生命，我這樣咳落去會否"chok"親佢呢? 好担心，一瞓醒，立刻找醫生睇。

因為只想取點藥食，就只上網找了一個近屋企附近的。

掛了號，同姑娘說了我自己驗過証明有了b，但咳得好厲害想攞d藥，姑娘極力叫我不如照下超聲波，睇下個胚胎著咗床未。

我問了朋友，都說只驗尿其實出到唻個結果都唔係好踏實，最好都係照一照。咁都好，我都想見下佢。

塗上啫喱於肚面，支棒在我肚腩游咗幾下，醫生說: 見倒喇! 好清楚呀，6周喇!

我都見倒喇，而家佢6 w，醫生話有1.67cm大。哎呀，我個寶寶呀!

其實佢現在只是一團組織，還未有任何器官，醫生叮囑我開始要食supplement，我早於6個月前已有吃葉酸的習慣，現在要加其他vitamins同minerals了。

2周後，再唻照過，應該可以看到bb心跳了。

好期待，但好担心自己會唔會做得唔好，咳得太勁，影響力倒佢。原來，真係會有d抑鬱 o家，又會過份担心，我一定要時刻放鬆心情先得!

期待8w...............................................

第三task....................bingo!!!

8月17日，晚上10時，正式知道.....................

兩條呀!!! 中了!!!! 我中了!!!!!!!!

非常咁驚喜，激動，幸運，我這個人，再不是只有一個人了。

又做番大陸人?!!

做下做下，份工都打咗2個月了。

上回提到，見工成功第二日隨即要返大陸，老闆話 "決定一份工啱唔啱自己，工作性質以外，返大陸廠都係一個關口，不如你早d面對，真係唔適應都可以早d知嘛"。

其實佢唔咁講，我都唔係怕返大陸，係担心你又未同我簽約，就要我返大陸了，如果返到唻你唔用我了，又唔認數，我咪做咗幾日義工囉!! 是關佢個秘書走咗，暫時冇人草擬呢d合約嘢。佢可能睇得出我咁諗，都有話一係佢搵張紙寫行字俾我，簽個名喇。唉，我又費事做到咁肉酸啦。

汕頭我第一次唻，都幾文明，當然及唔上上海北京啦。另一樣好係食嘢好好味! 尤其牛肉火鍋!!

而汕頭廠的同事，好得意，竟然全部都識講廣東話，有部份男o既，唔係好識講，但全部識聽! 我問佢地點解啦，答案係...................... "我地日日都睇TVB o家嘛!!"，吹漲!!

呢份工，唔係唔好做，間公司都有錢投資o既，老闆都識得好多門路的人，好多生意，都會學倒好多嘢，第日想轉行，都多範merchandising可以講下，唔使得skincare development咁窄。

唔好係成日返大陸! 我答應做呢份工果陣，老闆話要返大陸但唔經常，1個月返1次叫密o家啦。咁我覺得acceptable囉，有咩工唔使返大陸架而家!

但我想話俾大家知，我返咗8個禮拜工，我有5個半禮拜，都係响大陸的。咁啱有d project跟緊，老闆話 "你真係經典，真係史無前例，從來冇新人會一口氣返咁多大陸!"。

唉....................我覺得係我俾你坤倒啫。睇個勢，d project都唔會停o既，同我同grade果個女仔又鬼死咁鐘意返大陸個喎，比較之下，我唔返咪顯得我好冇責任感囉!

我老公都叫我認真諗下，呢份工係咪真係要做落去，成日返大陸，有咗bb點算? 即刻唔返? 老闆肯唔肯過你呢?

車...............我有咗的話，話鬼知佢啦梗係唔返啦，un成4粒鐘車上去架，點un呀! 而且我一早打算做個零月，就開始o我既寶寶計劃的了，再搵工，又沉淪番落個海度，搵倒又要再捱過試用期，咁我幾時先可以要bb呀! 唔得囉，呢份工我都要頂硬上，而家返多d，第日唔返，我都較為對得住個老闆啦。

so far，回來香港，第一task搵樓，KO! 第二task搵工，KO!! 第三task................................................start!!!!

搵工好難........

樓就租倒了，目前令我忐忑不安的，便是搵工。我以漁翁撒網的方式把CV送出各大小job hunter，係有上去見，不過冇一個有消息，可能skincare development呢d工種都係偏門d。

開頭呢兩個禮拜，都唔担心，仲幾爽o添，日日冇嘢做就攞本書落去嘆STARBUCKS，坐番兩粒鐘，等老公收工去食飯，真係少奶奶生活!

呢排開始，俾D HUNTER講得多，我堅決唔做任何有關MARKETING的工作，真係冇乜好機會。唔係我吊高唻賣，係我真係對市場同銷售好冇興趣，咁都做唔長啦。冇乜見工機會，坐STARBUCKS越來越不安，俾錢買咖啡買得好心虛，都成三廿幾蚊杯架嘛! 覺得自己好冇生產力呀!

唯有考慮轉工種，SOURCE下其他，發現MERCHANDISING原來都好多OPENING，有一間搵緊個要有開發護膚品經驗的，其實我幾乎合，不過我從未做過商務，佢又有意請M grade有經驗底，機會都細d，都照send去啦。

佢又好快有回覆喎，有工見，前幾日上去見左啦，間公司話大唔大、細唔細咁，都有廠房o既，個老闆好開門見山，話佢一方面buy我個人的工作經驗，但我真係冇做過merchandising，我係咪真係有興趣呢? 叫我返去考慮下先，如果想試下的話，下周再上多唻公司一次，同負責呢個部門嗰個女仔見一見問清楚工作性質喎。

目前又冇其他機會，又糧咗地成個月，老實講我當然願意再上去摸下佢個底啦，如是者今日再去咗一次，見倒果個女仔。

呢個女仔同我apply果個post係一樣position的，其實，個老闆呢個安排都怪怪地，人地唔多唔少一定對我有點敵意啦! 請件 "o靚" 俾自己使換下就話啫，請個一樣咁高咁大o既，點我又唔係，佢點我我又唔"gur"，最衰係呢個人冇MERCHANT經驗都可以同自己一樣GRADE果度唔妥嘛。

be honest，呢次見面，個老闆向佢強烈地express咗對我有興趣，就睇下呢個女仔肯唔肯同我夾喇的感覺 (真係，盲o既都feel倒)。個女仔可以點? 認同我又做唔出，踩低我佢又唔知搵咩原因，我諗佢冇辦法表態。結果個老闆咪同我開價，面試成功囉。

雖然搵倒工，不過我離開嗰刻，都冇開心感覺。因為，佢問我係咪即時返得工，咁我係o既，都冇諗過佢叫我第二日即刻返，仲要，返大陸。仲要..................stay 4日。

因為間廠在汕頭，搭車上去成4個鐘，上親去便stay數天。又係呢句啦，鬼叫我冇第二個chance咩，所以應承咗。但約都未簽，都唔知會否呃我上去賣器官。唔係我個人一向比較硬淨，成日都有 "自己一個去天津打工都試過啦有咩難倒我!" 的心態，都真係唔會即時答應。

就當上去睇下間廠咩料先，唔啱做咩唔做囉。

唔.....................都算係，搵倒工了。

租倒樓喇

終於租倒樓喇! 仲要係奶奶住開的屋苑，總算完成一大任務!

個單位响奶奶隔唻嗰座，同一樓層 (好穚!)，間屋都幾四正，幾大有690呎，好多傢俬都包咗喇，而且上一手租客住得好乾淨，連廁所的抽氣扇都冇塵的，讚!

5月4日睇，就決定咗喇，5月12日交樓，好在我唔使返工 (actually.......係冇工返)，清潔咗2日，搬傢俬又搬咗2日，按我勤力的進度我諗呢個weekend可以入去住了!

不過唯一估佢唔倒，個業主話，一年死約之後，極有可能收番間屋，因為佢想生仔返唻住，除非佢未能成功啦!

頂佢..........................................

我又係諗住生B，先租呢度近住奶奶，都諗住2-3年o家，如果佢收番，可能响我陀B的時候佢就要收番，我又再搵地方，到時籮咁大個肚搬嘢又幫唔倒手，你話煩唔煩吖!

我同老公講，個業主同我地講佢一年後有意收番間屋時，心裡有一絲諗過 "咁我希望你唔成功喇!"，不過將心比己，太惡毒喇唔可以咁諗o既!

點知我老公話................................"我响個心裡面已經諗咗好多次啦喎!"

哈哈.............!

做番香港人 ^_^

返咗香港喇!!! 都係香港的空氣、濕度、地鐵、巴士、人、狗仔........................啱channel 一d

返到唻，有幾樣嘢都即刻做，就係搵樓租、搵新工。

我搵番幫我賣層樓出去的agent陳小姐，問佢有冇租盤。都有睇咗幾個單位，未係好啱心水，唔緊要啦慢慢唻。佢同我吹水，講開我賣咗嗰層樓，佢話其實個租客住到我間屋好爛，連廁所的地磚都可以俾佢地住到裂哂，踩落去lock lock聲! 地板就 "畫出彩虹"! 而且睇樓時個租客住得好污糟，雜物好多，個書房基本上睇唔倒有幾大，全是紙箱，最頂癮係，唔俾睇主人房!! (痴線! 睇樓睇唔倒主人房邊個買!) 睇得5分鐘，咁多雜物而唔俾睇主人房之下，咁順利賣得出真係算好運。如果自己收番唻住，都真係要攞十幾個出唻執番間屋。

agent話可能睇屋當晚，時間唔夠個買家睇唔清楚咋，到咗4月20日收樓日，買家的父母都有同佢一齊收樓，仲帶埋個裝修師傅唻睇下點整。呢日佢地總算可以睇清楚哂，連d爛位都睇清楚了!!  個師傅係咁發揮佢專業審查精神， "呢度要執、呢度要拆咗再整、呢度......................."，我諗係重新裝修，起初個買家諗住少執o家咋，所以個agent話佢都好唔開心呀，佢咪不停同個女仔講 "唔緊要啦裝修嘛，自己住整好d" 咁囉。

聽完，都有少許心痛感，話哂曾經擁有嘛，不過都不及新業主心痛，荷包仲痛。

近住奶奶的同一屋苑，真係極少租盤，不過唔揀呢度的話，第二時奶奶湊bb就不方便。佢住緊的屋苑都廿幾三十年樓齡，即使有租盤放出，都俾人住到舊舊地。基本上，我睇呢個屋苑的單位，只能收窄要求，但求乾淨、企理、冇爛、最好唔向北 (佢呢度向北冬天真係好凍!)，已經唔奢望能找到 "好靚、豪裝、新淨" 呢d境地。最慘係，冇乜租盤! 想揀、想望下的機會都冇!

暫時我地住响奶奶度，有間房，係老公細佬的，佢一至五都在澳門工作，weekend回來，而家間房俾我地霸咗，佢回來要瞓廰，我都唔好意思! (雖然佢而家有個好大借口可以去女朋友屋企瞓)

搵工嗰度，都係send咗update CV俾HUNTER咋，希望快D有聲氣啦，而家日日糧地，出街食飯都度住度住。之前香港的公司老闆，唔知點解知道我回來了，佢叫我返去做呀，不過我仲考慮緊，我知道公司業績唔得，真係隨時執笠，叫我返去，做幾個月，如果大埋肚 (我計劃要蛇B家嘛)，佢走唻執，到時我仲點搵過份呢!

我仲有一個大獲的發現，雖然普通話勁咗好多，但我英文好似差咗好多，流利一點地自我介紹我都怯場，死喇死喇，要苦練操番好先得了!

天津份工辭咗喇.......

4月10日，收到期待咗幾個月的雙糧同bonus，我亦都按計劃、如期於之後一日，向公司請辭。

其實都幾老套，昨天出今天辭，不過無人不為己，雖然我個dept總裁唔想我走 (正值用人之際)，但佢都話 "你老公要調番香港，你要跟住回去，呢個理由咁充分，我都無法子啦!"。我的position係需要2個月通知，即係應該6月10日先走得，我梗係唔想啦，我向總裁話老公其實asap要回去，北京的家佢公司已經唔幫佢租了，想佢5月頭回港報到! 我想4月25日便走，即係唔夠2個禮拜!

我諗大陸同香港公司除咗產假、工作效率之外，仲有一個明顯分別是，大陸的領導通常人情味較重，能予你方便都盡量配合o既，佢肯俾我2個禮拜就走!

我辭職的消息好快就俾我最尊敬的123總裁知道了，123而家正在搞辦公室政治，搞曠工，一月起一直放no pay至今了，我諗佢係想董事長知道冇咗佢會點。我本來都好想走前能見佢一面，匯報埋手上的工作，不過佢梗係唔會為咗我返唻公司啦，我同佢通過電話，佢都好想我留低呀，仲叫我唔好理老公喇自己留响度，包保我發展順利! 唉，如果呢度係香港就好啦，公司個大領導咁睇得起自己，都開心o家，但現實就係咁都冇法子啦。

過兩日就last day了，呢排我每日都努力pack嘢，天津間宿舍房話哂都住咗成年，都好多濕星嘢，北京間屋就更加啦!

之前唔知幾時能回港都冇乜嘢，一有咗歸期，突然變得好homesick，好想馬上就回家! 阿媽當然就開心到爆! 同佢講電話都 "唔講咁多喇你返唻先講啦咁!"

買咗4月30日的機票，我返唻啦!!!!

香港的蝸居閃電賣了

呢排香港樓市好勁，睇樓活動甚活躍，我的蝸居在我去北京時出租咗，但都想襯層樓市價不錯，有錢贏時放咗去，儲備定一筆錢等個樓跌了而入手一間大D、升值D o既樓。

上咗車落番車，起初都幾掙扎，不過為了日後能搬大屋，呢個做法都係應該o既。上年我地都放賣，租客好唔合作呀，一次都唔肯放買家入屋，咁都冇佢乎租客係有權咁做。

租約到今年4月8日結束，我地2月時再同租客講明會收番賣出去希望佢幫下手啦，好來好去，佢最後都合作肯俾買家睇樓，不過好苛刻，只願意安排一個星期六的晚上，把所有agent group埋同一時段睇，每批仲只能入屋睇5分鐘即走。不過都唔知算唔算係佢幫咗我，因為限時睇樓 (而嗰排租盤真係放得少)，機會難逢，搞到我間屋好似 "搶手貨" 咁，d agent又各自同有興趣的買家落藥，話 "啱就要快呀"、"多人爭呀" 咁樣，我地嗰晚不停收倒agent的電話話有買家開價，我地見個勢咁好梗係等下啦，總知邊個願意俾一口價，就先到先得唔需要auction。

最後在3月初總算找到買家了，係個後生女同我差唔多大。我同老公隔兩日專程返咗香港上律師樓搞手續，預計4月20日交樓。

又落番車了，我同媽咪講賣咗樓賺咗錢，佢替我高興。但同奶奶講，佢就唔係好贊成，怕我地上唔番車，第日買過層新的又未必會近住佢。

之前話過等埋4月10日公司出雙糧同bonus後就resign，返香港冇屋住了!! 所以都要積極點搵租盤，應該租近奶奶，第時佢可以好方便咁湊bb! 佢知道我地將會住得同佢咁近，相信應該高興番o既...............

一年北京生活的終結！

咁耐冇BLOG，今日點都要記一記。

今天，老公告訴我，叫他調到北京的CEO，辭職離開公司了。而新上任的CEO，有意思讓他回港，有新崗位。

我聽倒呢個消息，真係好驚喜又意外!

最近讓我費剎思量，沒有方案的寶貝計劃，就是因為未有"歸期"，未諗通在北京定香港陀BB、未諗通好冇QUIT咗天津份工回港先要.....面對著一堆問題!

現在，回家有期，突然一切煩惱都冇啦咁

之前話，計劃趕不上變化，真係對極! 老公話幾時都可以預備回去o家喇，反而我仲想等多陣，因為4月10日是公司的雙糧+奬金發放日，當然攞埋先RESIGN啦!

我諗，4月底5月頭倒，我應該可以做番香港人了。

計計下，決定來北京，只是一年前的事，無想過咁樣就過去了。

如果上年知道老公只會stay 一年，我諗我一定唔會咁冒險，辭咗份工咁樣跟佢來。這樣的話，我便沒有機會親身感受離開香港、走進大陸的生活體驗，which is 非常難得的啊！

由吃炸薯條變了吃炒土豆絲

由大家樂早餐變了豆漿燒餅

由香港口音普通話學會帶點卷脷

感覺陌生的大城市變了第二個家

縱橫交錯的北京地鐵再也難不到我

學懂了到西單及秀水街買衫的講價技巧

一年前，甚至嫁俾呢個老公時，我發夢都冇料到自己在2011年會有此生活體驗的機會。

人生就係咁，充滿變化，估佢唔倒。

可能，個天真的早已替你安排一切了。凡事順其自然，不用擔心，也不用強求，享受突如其來的驚喜吧！