就唻2012，龍年，好多朋友都計劃生龍B!
我都想要小朋友喇，始終年紀不少了 (30+
)，我較想要蛇B (尤其係之前同老公一齊睇相，相士阿"畢女士"話蛇B會很旺我地)，即係2012年下半年要、2013年生。
但是問題一籮籮，我地現在北京，歸期未有，決定要B的話，都要考慮 '北京定香港陀B?"、"QUIT唔QUIT工?"、"有咗先回去定回去先有咗?"、"老公同我是否同步回去?"..................
當然，陀BB有親人在身邊會好D，咁就意味住要回港。但老公仲响北京，唔通佢飛番落唻 "做人"，做完飛回去，如果唔中奬又再飛落唻做人..............咁好似唔係好WORK喎! 一係就 "做咗人先"，中奬後即刻QUIT工，回港養胎，但係來臨的9個月都不可能再找到工作 (唔會有人請，請咗唔夠2個月見倒你肚凸凸都知咩事，都唔會PASS你PROBATION啦)，咁樣生計就成問題，冇嘢做待在家我都會好悶。
大陸的同事就建議我，不能放棄大陸 "前一後三" 的優厚產假! 唔係禮拜，係 "月"，TOTAL 4個月，仲係FULL PAY (香港係八成only)，開刀生仲多半個月o添。佢話: 有咗後，即刻叫醫生開醫生紙証明要休息、瞓床，向公司申請保胎假，放到個肚三個月大 (因為大陸係一孩政策，大陸的公司通常都肯俾你放，不過冇人工)，呢段時間咪返香港等阿媽照顧、養胎囉。等個肚穩定了，返唻天津繼續做到個肚7個月，就向公司申請要放產假了，原因係回港生產，嗰4個月產假，攞 '前四後零" (雖然咁樣公司都一定知你將會唔撈了，點會仲返來先得o家)。咁樣的話，懷胎10個月都只係中間3個月待在天津啫，但能享受產假，都好和味!
我覺得咁樣幾work! 同老公講過，估唔到佢一聽就反對，佢覺得呢d產假錢雖然吸引但不及bb重要，唔好夾硬唻啦咁喎。有咗後攞紙放保胎假，搭飛機回香港咁危險，醫生都唔recommend的，仲要來來回回! 如果保胎假照放不過待在北京自己安胎，我都係解決唔倒冇媽咪奶奶的育嬰食物呢個問題 (北京的家冇煮食設備的)。 而且中間嗰3個月在天津上班住宿舍，冇啖好食，營養欠佳，又得我一個，老公唔放心，加上不在香港點樣覆診? 較有名的婦產科醫生通常一早要排期，又邊有醫生會接你呢d中間冇覆診o既case?
呢方面，我确實是冇老公想得咁細密，雖然full pay產假好吸引，又真係唔會咁順利咁攞倒喎。可能回港先做人呢個方向比較實在，問題係............幾時先? 老公你幾時調番去呀??
同朋友傾訴呢個煩惱，不過佢地話，計劃趕不上變化，諗咁多做咩吖!
我覺得都啱o既。BB係禮物，唔好度住度住，急唔唻，恨唔倒! 自自然然啦!
但係，一日响呢度，冇歸期，年紀越來越大.......唔係話放鬆就放鬆倒囉！
2011年11月8日星期二
寶貝計劃，made in.....?
2011年8月27日星期六
天津的公司晚宴
刚過去的8月3日係我公司的16週年，舉辦了晚宴。但不是人人都可以去呢，只招待高級管理層同海外的經銷商。
因為聽講d嘢好好食，我部門的一個經理"阿肥妹"，好辛苦R了兩張門票(300蚊美金一張)入去食一餐，仲益埋我o添
(不過我老公好衰，佢話可能肥妹唔係志在食，係志在入場釣金龜)
不過冇free lunch，我地要做接待工作來抵銷呢一餐。
舉辦的場地是公司自己建的宴會大樓，即下圖金字塔形那座，很是有氣派的建築 。我天津公司就是有錢，咩都要型，要駕勢，咁先可以贏得當地政府的支持。
食物其實都係一般般啦，不過相比在宿舍員工餐廳吃雞脾大豆牙飯，呢餐真係天上人間!
晚宴會場同外觀，好靚，佩服!
同事門啊! 桃紅色就係肥妹! 男嗰個是品牌部的總監，後生果陣應該幾靚仔!
下面嗰2個女的真人幾靚女架!
散場仲有煙花睇!
2011年8月21日星期日
公司的轉變
成2個月冇上過唻了。
2個月，公司轉變好大呢。
唱大草园果個經理，受唔住123多次公開的責備，唔撈，走咗了。
唔彈鐘，唔知咩原因，7月20號又走埋了..............
我個部門，少咗一個經理，總監走咗，變咗孤兒仔，D工作推動唔倒，生產力低咗好多。
唔彈鐘响度果陣，因為佢"唔彈人鐘"、咩都攬唻做的性格，攪到我鬼死咁多嘢做，成日怪佢為咗攞表現要下屬做埋D非我屬類的工作，個心幾唔妥o家都.............
今天，打開郵箱，再冇人SEND email 來咁滯........唔係話一d工作都冇，好得閒，只是冇咗個阿媽咁樣角色的人，每天叮囑你按時要完成什麼，你死你事、d嘢你甩你事、俾123鬧都係你自己o既事，冇人提你冇人care你，仲有其他dept可能好想見倒你俾人鬧o添。
唔彈鐘，呢一刻我有d掛念你.................
點解佢會走? 聽講佢話佢奶奶生cancer，要回台灣照佢顧喎。
我覺得有少少奇怪，第一，佢仲差半個月就過probation了(總監是半年，probation期間工資只有八成)，咁都唔等? 佢人工好高o家，好似十皮嘢。第二，佢走得好sudden，星期四我仲同佢傾公事，我一點都feel唔係佢想走，因為佢鬼死咁上心同落力，又冇唔開心吖，但佢星期五下午四點就走了，連宿舍都即日check out埋，所有嘢打包搵courier送番哂台灣。佢底下的經理，包括我在內，都應該同我地講聲吖，我地平時都有傾下計咁，但真係一句都冇交代。第三，佢來大陸做嘢十幾年，不嬲都冇照顧佢奶奶啦，即使知道奶奶病了，都不用即日resign、即日飛回去咁急囉.......
我自己估係，佢可能聽倒d閒話，俾人攻擊自己，努力工作又冇人認同，呢個MOMENT要爆了，心淡走囉.......
因為佢成日唔彈鐘咩都做，攞咗不少表現機會，帶領得我個部門幾好咁，好多總監唔鐘意佢，甚至同自己的手下講，佢冇料又扮有料，扮哂响好多公司撈過經驗十足，唻到呢度一d實際表現都冇，淨係識响123面前present得好好。
我八倒，佢走時123都留佢，唔批准的，佢好堅持話 "咁你就當我請病假啦，我點都要走..."。昨天，我向123汇報，佢都感慨地對我講 "你阿唔彈鐘走果時，佢都好難過呀，佢話冇人support佢，好孤單，唉，我何嘗唔係冇人support吖........."
嘩，你係一日之下萬人之上的123總裁喎，你不嬲都唔使人support啦，下面的人只需認同你，行動咪得囉！
我估唔彈鐘真係做得幾唔開心，但發生咩事先突然要走，真係得佢自己知。
我而家日子一日一日咁過，都冇話唔開心o既，我都係過客而已，老公走，我就走，take it easy啦!
2011年7月10日星期日
飯敍 @ 天津維多利亞飯店
上個月的卡拉OK大賽，阿男經理贏了最唔知咩大獎。唔記得係因為每個參賽者都會有獎，分豬肉嘛，大家開心。
有200蚊獎金，順便搞咗個部門敍會，去咗天津一間叫維多利亞大飯店度食自助餐。
其實只不過當同事敍會而已，都不至在食。
這次是我第一次踏出公司，到天津的市內走走。
順便同大家介紹一下我的同事
**長髮的是張佶，靚女。右邊的是張坤，我部門下屬，同我好好傾o家....**
**我部門女多男少，男的直情差唔多一個都冇唻**
**左邊的就是蒙古人了，黑衫的是唔彈鐘，黃衫者是肥妹，成日要我介紹個港男給她，沒有男友呢**
**中間個男的係我部門總經理，也是公司的副總裁，雖然現在老了但是後生時應該幾靚仔o家**
呢班同事對我好好，雖然我講普通話唔係好好，佢地都會成日搵我傾計，第二時我回香港，佢地唻玩我都會盡地主之宜o家...........
2011年6月30日星期四
去長城做好漢 +入咗黑店做水魚!!
唻咗北京3個零月，都一直想去登長城做好漢! 前幾天老公的表弟到訪北京，約好去一趟居庸關!
因為居庸關在六環 (北京以環來分，最近、圍繞天安門 的是二環，外圍一圈是三環，越郊外越"多環")，我家在南四環，要先入番去東二環接咗表弟，再一齊入北六環。因為居庸關都係有名的旅遊景點，太晏去人會好多，所以一早租咗車(連司機)，4:30am唻我地，入到去都9:00am! (車程約2.5hr，只係我地去咗食早餐所以担誤咗)
到咗居庸關，喺地面瘋狂拍照後，正式登山，爬到上頂點 ，行咗約2.5小時，其實只係一路上，沒有難度但需無限氣力同腳骨力，因為條路高之餘，梯級極大級! 我要手腳並用，猩猩咁爬上去，唔用對手幫幫忙對腳擘咁大會失平衡! 都唔明d大陸人點解要堅持著高踭鞋唻爬長城，仲要加對短絲襪，我諗我再住多少年都不能被同化!!
約12:00am，我地已返落地面，鬼死咁肚餓，叫個司機車我地去醫肚，我地話求其食d農家菜得o家喇叫佢介紹啦，佢車咗我地去一間簡樸的飯店。
(水魚的故事開始了...............)
入到去，看餐牌，d食物都唔貴，十零廿蚊，典型的大陸飯店。我地問佢有咩介紹啦，佢話食隻雞啦，走地的，自己養，我地看雞嗰頁餐牌，3-40蚊啫咁ok啦要咗一隻。跟住又問佢有冇d簡單菜式，佢問我地食唔食炒雜菇，都係自己種，咁咪是但啦菇啫。然後佢介紹我地食魚，話係人入到來都叫的，好有名，我看菜牌，100蚊/斤，我地得4個人，都係斤零啫，又要咗一條。再叫咗個炒油菜，total4個餸。
只過5分鐘，條魚上咗枱，我都未開口話 "'有冇咁快呀，魚要撈上唻、要擋、要蒸，起碼都等半粒鐘啦!!"，個侍應已講 '我地呢度唔會因應你地幾多人而捉條幾大的魚o家，撈上唻幾大你地都要要o家!"，放低即刻出番去。我也四人互望，無言，唉，俾人搵苯了.................條魚3斤幾呀!!!! 我諗係平時去飲，成圍枱食嗰種魚的1.5倍大! 就算係即撈即擋，都不可能5分鐘上桌，擺到明係一早預備唻 "坤" 水魚啦!!
其他餸，隻雞、炒菇、油菜都上埋，我地心情超差咁食啦，條魚咁貴梗係要盡量食啦! 雞其實普通，有幾粒魚蛋、栗子一齊炆，所以都冇食哂。碟菇就係平時食倒嗰種口味，秀珍菇+冬菇+草菇炒埋一碟。
埋單，我預咗因為條魚都成300幾，呢餐都要500蚊啦。一看.........................RMB 960!! 仲貴過我地前一晚去大董食烤鴨!!!
我立刻睇單解究呢960點唻，一看...................................................
隻雞，rmb 280!! 有個好勁o既名，原來佢所謂o既雞叫 "乾隆一品雞" (死啦去，只係栗子魚蛋炆雞咋喎)
個炒菇，rmb 180!!
油菜就算啦，都要rmb40! (可能你地覺得唔貴，但係大陸食碟菜10蚊 o家咋)
我唔知講乜，只係話 "我接受唔倒，我唔會俾呢個價錢。"
個侍應，我諗佢地每日都係咁坤人，佢回我 "我出去問經理可否給你打折" (如果冇心呃我，我食幾多都要俾，點會肯咁順攤打折!)
過咗數分鐘，佢入番唻，話 "經理話當你係熟客俾九折，800啦"，我仲係好冤，唔俾，要佢經理同我傾，佢唔肯，大我話 "食咗嘢就要俾錢，同邊個傾都冇用"。我話 "條魚我自己疏忽冇在點菜後講明大約要多少斤，俾你入倒位仲要5分鐘上枱等我連糾正的機會都冇"，都算啦認命，但個菇點值180蚊吖! 個八婆話呢d係"珍品"，奇菇，貴嘢 (頂佢啦，完全係街市平日阿媽成日買的菇!!)。隻雞呢，我話 "我點菜時睇倒d雞都係3-40，呢隻雞菜牌都冇，我邊有叫你寫隻乾隆一品雞先!"，個八婆超淡定 (佢一定訓練有數) 回我 "菜牌有，第二頁"。 我翻開睇，呢隻一品雞唔同其他雞放埋一齊，另外列出唻，同頁仲要不是雞一般唔刻意睇根本唔知佢咁tricky!
我話 "你地咁樣分明陰人啫!!"，佢繼續淡定講 "點菜後，菜牌一路放在這裡，你地冇發現啫"。我地簡直俾佢激到 "啤........................" 一聲!!
之後，800蚊我地堅持唔俾，在枱面放下600蚊，走出房間 (我地豁出去了!!)。出到飯店門口，見我地的司機也在，我地同佢講呢間分明黑店，點知，個司機好淡定，似乎已預先乜事咁話 "如果你地點菜牌上有的食物，看清楚價錢，咪冇事囉"..........................................
豈又此理，佢根本知呢間係黑店，都車我地唻!!! 佢一定有收呢間飯店的佣啦!!
個八婆侍應出到唻，攞住600蚊梗係唔罷休啦，閙我地 "香港人冇品，你地响香港食個早餐都一千啦，食嘢梗係要俾錢啦!"，我地同佢 "鬥長命"，睇下最後邊個堅持唔住，其實600蚊真係俾多佢啦，俾下佢有幾多耐性囉。我地都有講過"報警囉!!" 呢d說話，但係呢間嘢d侍應，訓練有數，一於 '好吖最好就報警" 的態度。(大陸的公安，點會幫遊客吖，而且佢地又確實較有理據)
結果我地對峙了半個鐘，冇進展，冇法子，我地話 "算! 頂盡650!!"，d侍應商量咗一陣，答應了。
成餐飯，搞咗兩個幾鐘，掃哂興呀!! 本來今日唻做好漢家嘛，結果做咗4條又肥又大的水魚!! 最死係，人地又似乎冇問題，又確實是我地的疏忽，做咗傻仔，呢度過唔倒自己吖嘛!!!!
以後响大陸，大大小小的飯店，真係要點餐牌有o既菜式，斷斤稱的必須講到明要多少，呢次教訓真係深刻呀!!!
2011年6月18日星期六
公司卡拉OK大賽
前兩星期，公司辦了一個卡拉ok大賽，我部門都要派代表參加。 唔彈鐘又想攞表現，想我地諗個別開生面的表演，頂，忙Q到死，冇人願意出面，好在有個男經理，好鐘意唱歌表演，自己主動出戰，我地梗開心啦，但唔彈鐘就覺得唔夠勁，唔能夠留下深印象俾123。但又唔好意思拒絕果個經理啦......專登開咗個會唻討論呢件事:
唔彈鐘: 我相信XXX肯自動上陣，一定係對自己歌喉充滿信心，我都好期待...............
眾人: 係呀佢唱得好好o家，派佢去夠o家喇.............(大家都唔想郁，包括我!!)
唔彈鐘: 但是我地有成廿個人，只派一人出戰個氛圍唔係好夠...............大家不如腦力激盪，再想想啦!!
眾人: 佢唱咩歌呀?
阿經理: 蒙古大草原呀................ (一.一") (眾人側目......)
一個新唻的妹妹仔: 啊! 我之前公司都有表演過跳舞o家! 係民族舞，可以借倒4套舞衣呀，我俾相你地睇!!
(套舞衣，好有民族風，分2截，中間露好多肉，肥的穿上會很難看。d顏色好誇張，要化好濃妝唻配果種呢，好襯大草原!)
唔彈鐘: 呢個主意太好了，相信X經理不會介意同台表演o既，佢地不能搶你風頭的，你放心!
(但我望倒阿經理唔係好開心............)
小妹妹: 我有4套，有冇人想跳呀?
(冇人有反應.....大家沉默咗成幾十秒，阿經理簡直冇出聲啦)
唔彈鐘見狀:.........er........一係我地派幾個新人(剛有4個新入職，但當中2個好肥)，俾機會佢地表現自己，為部門出力啦!
眾人: 好好好，應該係咁啦............... (新唻的黑面，尤其肥妹，舊人係咁叫好，包括我.........)
唔彈鐘: 你地唔出聲我自己點啦!就 ABCD你地4個啦........(除了提議果個之外，其他都黑面，但佢地級別低不敢SAY NO，俾唔彈鐘屈咗機!)
此時，一個老女人經理: 啊......................!! 其實，我係一個蒙古人唻o家..........................
眾人: 咁......................又點呀?
老女人: 我幫你地排舞啦!!! (一.一") (眾人又沉默了................)
唔彈鐘: 哎呀! 好好好.........太好了，咁樣先有氣派，先有看頭!!! 但係....................你估餘下的人仲可以做D咩嘢唻表現自己呢?
(頂................仲唔夠!想點先夠皮呀!! )
唔彈鐘: 起碼都要啦啦隊!諗D口號呀，動作呀咁! 邊個可以幫手呀? (眼睛轉向我.............!!)
(唉)我咪: 好...........咁...........我囉，我諗啦下............
就係咁，在唔彈鐘疲勞轟炸之下，我地又多咗個工作以外的任務，替她討123的歡心..........
不過算啦，未試過同D同事咁樣玩，當日都算幾高興，最後冇贏到呀，但有200蚊參予費囉。
俾D相你地睇:
跳舞衣頂帽
比賽場地
我的同事!
2011年6月17日星期五
過試用期了
成 2個多月冇上唻了，因為yahoo blog在北京是blocked的。昨天才開通番個server (把我在北京的電腦 ip射番香港再射番過唻，現在上網如同香港了)，去番facebook，終於同大家親近番。
話說回來，我已經到埗三個多月了。我覺得自己尚算適應得快，還去了不少地方、找到香港口味的茶餐廳，去腳底按摩都2次了，地鉄我都摸得幾熟下啦(有十條綫呢!!)，你地唻北京，我都可以介紹介紹呢!
6月15日我過咗試用期了，每天神速地過，8:30上班開一個會去到12:00pm食飯，12:30食完又開工，一連串e-mail後又5:00pm，大家都下班(因為趕班車)，我住宿舍通常做到六點零先走，咁又食dinner了，工作多的話返到房間繼續做，沒有工作便煲下劇咁，慶幸天津有個華娛台，成日播韓劇，我已經睇咗面包大王、粉紅色口紅、妻子的誘惑、秘密花园、瑪莉外宿中，有時電影台會播周星馳! 逃學威龍同唐伯父點秋香配咗大陸口音，一d都唔識笑!!
公司方面，有個一人之下萬人之上的女總裁，公司最大就係佢(董事長不管日常事務嘛)，管幾千人，佢最鐘意排哂所有員工响一間房度，好似小朋友咁叫我地數123咁報數，以反映佢的團隊形象素質高!! 我叫佢做123總。不過佢好能幹，40歲唔夠便做總裁，我收到小道消息說她原本是董事長的秘書，跟住就一路升上去，仲同董事長夫人有過過節 (唔講都知乜事了)。佢出名好惡，我跟她開會4-5次，開親會一定搵倒一個人唻駡，不過佢駡親都係好有道理的，佢的思路好明確，但下面的人跟不到佢的節奏做事 (始終都是大陸做嘢的作風，得過且過、交咗功課便算的那種)，所以佢一天到晚都找到要駡的對象，佢個速記仲會把佢駡人的內容一五一十的記低再作為minutes發給開會的人，好好笑!! (例如: xxx在說今年的業績，123總在旁冷笑了並伸了一下懶腰，指導xxx說做事不能沒頭沒腦..........佢都會記在minutes上!!好頂癮!!)
不過我幾鐘意啊123，因為佢領導得好有道理，只要安守本份做足准備，佢指出你有錯你唔好搵藉口承認錯誤同跟進，佢般就不會開口駡，係果d "我冇跟進因為成個禮拜都忙住做另一樣嘢......." 呢d人就會被駡得好金，仲會扣10%人工。係呀冇錯，我公司好多規距，好容易會踩倒屎就扣人工了，如星期一早上的升幟禮遲咗少少、著咗露趾鞋、著鞋唔著絲襪、踩咗草地一下、工作枱亂咗d、唔記得戴上公司個心口針......都有機會冇10%人工，你仲會連累上級領導一起被罰，你扣10%，佢要扣15%! 咁你就大罪了!
我仲有個上司"唔總監"，唔係因為姓吳，係因為佢收到123的任何指示，無論原本屬唔屬於我地部門佢都攬哂返唻，之後就淨係會派哂落唻讓我們做，所以我叫佢 "唔彈鐘"。點解要咁? 唔敢rejectd 123囉，驚被駡、又驚被扣人工。唔彈鐘都是新唻的，早我2天入唻，佢試用期仲耐要半年，而家係咁攞表現，我覺得123暫時唔係好欣賞佢，所以佢更加焦急，又好驚我地做錯嘢被罰人工連累到佢，佢每個禮拜都叮嚀我地著好d，見倒123嗌得大聲d，要留下好印象俾123，等自己都可以加分。唉..................
不過，我留在這裡都是陪老公，又當學習國內上班生活，練好普通話，咪當融入佢地文化，反正咁忙，D時間咁快過，都冇壞吖.....................
我公司環境:
辦公主樓:
OFFICE大堂:
OFFICE內:
公司宿舍飯堂:
房間環境:
2011年4月15日星期五
做咗一個月北京人，先遊頤和園！
唔經唔覺唻咗北京生活都有成個月，今天上班已滿一個月了。
老公昨天去了清洲工幹，呢個周末難得回到北京，又是自己一個人了，不過總好過在天津的宿舍裡待2天假期。
上班的日子，早、午、晚三餐都食公司嘢，雖然係激平，一日三餐可以十蚊人仔，有時食豪d加隻雞脾咁都係13蚊，但真係好q悶，口味來來去去都係咁，所以星期五晚一回到北京，我都會食好d。屋企樓下剛開了一間新的西餐廳，叫music & film，裝修幾西化，有得睇電影，有扒据，有咖啡同wine飲下，相比隔唻的北京小店，坐得好舒服。我第一個月拿到北京的人工，便和老公去這間嘢慶祝一番，食咗一個pizza、意大利海鮮湯、薯條、雞翼、意粉，都係八十幾蚊人仔，都幾抵!
星期六沒什麼事做，會去"西單"行街買嘢，我愛買衫買鞋買飾物仔，找到一個叫"新一代購物城"的地方，類似旺角中心咁，多年青人嘢同d平衫，但樣樣都要講價。目前我去過三次了 (明天去第四次
)，次次都執倒筍嘢o家! 上個禮拜才跟老公去完，佢買咗對鞋，開價RMB 526，講講講................最後................................RMB 120成交!!
上個星期，去了慈禧的遊玩地，頤和園。地方好大，我地行咗5個鐘，欣賞了湖景同歷史遺留的宏偉建築，但風景其實一般，叫做到此一遊而已。
呢個塔我用了無比力氣先登得上!!
呢條叫"十七孔穚"，我都有踩過上去o家......
慈禧花咁多人力物力財力建造出唻的頤和園，其實真係冇乜咁特別，朋友想去的話我都不會非常建議要去。
遲下慢慢會去多d地方，天壇、故宮等，難得來到北京嘛。
2011年3月19日星期六
天津公司..入職天
3月16日那天7:00am起床，悉心打扮一番，穿上SUIT，因為是第一天上班。
7:50am出門口，到樓下的飯堂食早餐，超平! 豆漿、滷水蛋、菜肉包、燒餅、玉米粥等等等等，1蚊1蚊咁....通常3蚊都好飽了。
到公司大樓，真係好大! 我沒想過一幢會展咁o既嘢會是一間公司所擁有，70萬呎地方、3000員工、全中國眾多企業中排頭22位，decoration都很講究。
我在 7樓工作。人事部帶我走了兩層樓介紹地方，都用了半個鐘。(為什麼不帶我走勻全公司? 因為太大了除了這2層的人會間中接觸一下，其他同事根本沒機會識)
午餐是12:00-12:30pm，只有半個鐘，很短! 後來知道這是新例，在我來之前兩星期剛轉的。以前竟然有11:00-1:00pm的午飯時間! 雖然說以前是過份地多了，也不用一刀切吧! 可能我腳頭唔好啦!
午餐選擇好多，員工大多去二樓的飯堂。套餐 (一飯一湯兩餸) RMB 4蚊，有6款餸揀，另外有COUNTER食"蓋飯" 的，即香港的碟頭飯 (淋個餸上飯面)，約RMB 6-7蚊。也有COUNTER食麵，如紅燒牛肉麵、擔擔麵等，約RMB 5、6蚊啦，我最愛食! 有一個COUNTER好特別的，叫 "回民專用"，FOR回族人仕，我冇排過呀。
三樓都有一個飯堂的，通常經理級以上、總裁等會唻食，這裡食BUFFET的，沒有套餐，涼菜、主食、甜品、生果以至咖啡都有，貴D，我估要30蚊一餐。
頭幾天返工都冇乜嘢做! 5:00pm收工sharply走人，個個都是，因為大家都要趕班公司的shuttle班車，出番去天津市區，班車5:15pm即走，趕唔倒就得 "打的"了。
我無所事事的，5:15pm返入宿舍"攤"下，6:00pm到飯堂買飯，不能再晚了因為7:00pm便close，6:30pm什麼餸也沒有了。因為太早食，到10:00pm就餓，夜晚都要餓住瞓! 日日都期待星期五回北京。
回北京的班車逢星期二、五的5:15pm開，不走高速，我昨天經歷過，5:15pm開車到北京地鐵站，去到要7:10pm，再轉乘地鐵回家，8:30pm才回來，很是折騰!! 星期二回北京的話星期三早上6:45am有車開回公司，但走高速，約1小時到。我要搭就5:45am要出門口，不考慮了。我星期五回北京，星期日晚7:30pm有車回公司。
幸好我的一個下屬都是住北京的，平日往返兩地坐車都有個伴。
下個星期要接受公司培訓，派咗套運動衫唻，娘死!! 同埋都開始有project做了，我都要俾心機做好d我個first project先得!
有樣嘢好得意，D同事見我用左手寫字會好驚訝的! 我話 "香港好多人都用左手啊!!"。原來，响大陸始終傳統D，用左手冇禮貌，一定會細細個迫番你用右手。所以成公司幾千個人都係得我 "咁冇禮貌"!!
2011年3月15日星期二
天津入職前一晚...宿舍篇
3月15日的晚上，天津公司派人到北京來接載我入天津去了。走高速的話，大概一小時便到。原來天津跟北京是這樣近的。也可能因為我在武清區的關係 (這裡是天津與北京的中間)。
8:10pm入到公司大閘的正門。門外看見一架雙層巴士 (就如HK的冷氣巴士)，車身是有公司的名字及圖案，嘩! 原來是載員工入宿舍的 (用巴士?!!)，誇張咗!
一看公司的範圍，天啊! 實在太大了。
因為夜晚，看不清楚周圍環境，但也看見一幢大約像會展一樣的building，這是辦公主樓。隔離有 2幢興建中的建築物，一幢是橢圓形設計的、一幢是金字塔般的，據說都是日後用來開國際會議用。
到了員工宿舍的入口。左邊有間supermarket，方便員工買些日用品。右邊是飯堂。正中間是reception，辦入住手續。經理級別住的是2人房 (低一點的4個人一間呢)，因為我怕生活節奏很不同 (例如我成點先瞓、又鐘意睇電視)，所以讓hunter替我向公司申請要單人房。但那時候才發現人事部沒有特別通知宿舍的負責人預留一間單人房給我，而且差點兒連房間都沒有呢 (經理房很爆的)! 我山長水遠來到唔係冇地方瞓呀?!
最後總算找到一間，這麼晚了，睡醒明天到公司再算。這所宿舍是酒店式的，什麼也有，帶點個人用品就可以入住了。住宿費很便宜，這樣的房間一個月只需RMB150，當然已包水包電包上網了，就真係酒店一樣，但要自己打掃。
入到房間，都幾企理喎! 驚喜發現原來這間房尚未有員工入住，即我還沒有ROOMATE，目前仍可算是單人住! GOOD!
HUNTE冇吹水喎，面前的確實是一所酒店的樣子，當然都不是鑲哂雲石嗰種啦。原來我公司有其他業務是做酒店的，在天津就有一幢。所以宿舍都採用酒店形式。
配套不錯，房內有電視、衣櫃鞋櫃、直身鏡、床頭櫃、床裖被舖都有了。還有一個露台、有一面絲絨紫色的窗紗及窗簾，幾型! 露台好大可以"浪"下衫。樓下還有電影播放室、卡拉OK房、桌球室、乒乓球室、健身房等，唔知有冇泳池呢?
輕輕的打掃過房間，掛好衣服，都11點幾了，沖個涼，試下上網，都OK! 但封鎖得好嚴喎，本身SETUP咗的翻牆 (即是在大陸都上倒FACEBOOK這類封鎖的網頁的一個TOOL)，响呢度都係BLOCK的。算啦都係瞓了，明天第一天返工，驚遲到，8:30am要報到! 早抖!
2011年3月10日星期四
正式展開北京生活
2011年3月10日下午5:00PM，正式展開北京的生活!
剛到埗，天氣變暖了，有17度!! 對比一月初來的時候的-10度，相差27度呢!!
暖了比凍了好，但我沒準備很多合適的衣物 (帶來的全都厚厚的!!)，待肥佬15號回去的那一趟替我再帶來吧。
首次看到北京 “我的家” ! 地方不算很大，約600呎，但擁有100% 實用率! 很好用。肥佬明顯地也有把地方打掃過，蠻算乾淨的，而且一入屋已有一對屬於我的拖鞋了，讚!
老公說，的未到北京前，把我的拖鞋放在門邊，感覺像 ＂老婆快來了＂般，冇咁孤單。
家在 “公益西橋”，樓下有好多食店，很多選擇呢。正式的北京第一餐，光顧了 "齊記老北京烤肉"，是一家小店，桌上放了一個熱燙燙的炭煱，肉在上面燒。 “店小二” 教我在肉差不多都燒好時，灑上一大堆大蔥、芫茜同炒，用燒餅夾唻食，果然不錯。
今晚要好好睡一覺!! 明天很多事要做，到醫院做入職體檢、到工商開出糧戶口、申請電話卡、還要與獵頭公司的人見個面。
人生路不熟，我還先要好好查探一下往所有地方的路線。北京地方超大，即使到了最近的地鐵站下車，還是要轉的士才到目的地。
北京的生活尚在適應中，最大分別是日常的禮節，如有車到不會讓人先下車才上車的，你這樣的話會讓排後面等上車的人責駡的。而且不論男女老幼都是愛隨地吐啖，甚至在地鐵大堂都是這樣，簡直嚇怕我。但是，千萬別想指責對方，因為 "你才是例外"!!
這裡的人第一天報告完畢，網路也不是很通，看來不能經常上來了。
2011年2月28日星期一
北上倒數第9天
3月10日，下午1:20pm，我便走了，將進入一個人生的另一旅程。
我為新生活興奮，同時，那份陌生感覺又帶來莫名的恐懼。
轉變帶來不安定感，同時，又帶來生機。
心情很複雜，但還是令我期待。
今天上班，仍然忙碌著handover的事宜，last day是8號，希望新人頂得順，Katy加油呀!
今天晚上，就要勞碌地pack好雜物、春夏秋冬的衣服清楚分類、安頓好貴重物品、收藏好儲了多年的烘焙工具、結婚相等等等等。真係好多嘢，我已經多天3:00am才睡，好鬼眼瞓，人都癲呀!
前幾天，已忍心地把阿女用膠膜重重wrap好，送到奶奶家代為 “照顧”，佢會否掛住我呢? 我會掛住佢囉。
上星期五，舊同事樽樽、阿STEP + 佢老公 & BB 與我farewell，多謝師奶仔阿step 的利是，及樽樽的漂亮圍巾，我會帶埋上去。走前見不到樽樽的腹中塊肉真面目，但肯定是個肥肥白白的bb女，記得send相俾我呢。
昨晚，與老DA、IRIS + 佢老公 & BB farewell了，我地多年姊妹，雖然少見，不失友誼，不要把我忘記啊 *v*。祝晴晴越大越靚女，老DA快d有聲氣啦!
2011年2月26日星期六
蝸居租出...
今日真係好高興，令我最頭痛的事，處理了!
就係我的蝸居。終於租出了。找到一對預備結婚的租客，職業不錯的，還樂意一次過付了12個月的租金，不用身在異地的我們時刻掛心著。
個心真係好 “紓緩”! 專登打篇網誌紓發一下!! (因為我一旦飛走了，有租客想睇樓便不容易，我又不願交低鎖匙嘛)
*********************************************************
這次北上，對我來說，面對著很大很大的挑戰。
回想初初決定時，總是有無數個問號煩憂著。
生活環境是否能適應? 到步後容易找到工作嗎?
只有數千元做不做? 數千元的工都不請我又如何是好? 老公天天上班我無業的話做什麼好?
會否胡思亂想呢? 响香港遙控搵工易唔易呢? 有冇人so我呢?
香港層樓點好? 賣咗佢回港後是否更難買番? 租出去遇著租霸點算呢?
還是不去更好呢? 然而不去的話老公自己一個點算呢? 我自己一個更加點算好呢??
不要笑我多慮，我為這些問題失眠了多晚。
然而今天，走到這一步了，想起來真的不易。
托眾人的祝福，目前每一步還是走得挺順利的，一關一關的衝過了。
臨行前，還有更多事務尚要處理，但很重要是，我必須抽空與我最愛的親友一個一個的見面，聚一聚。
你地等我啊!
2011年2月14日星期一
2011年2月11日星期五
211 again
又係2月11日，我同老公的拍拖 + 求婚週年紀念日。
不同的是，今年自己一個人過。老公在遙遠的北京。
今年的211禮物，不是老公送的，是新公司送唻的，正式受聘通知書一份。
終於都落實了，3月15日是我上班的日子。
所以，211又多樣值得記住的事件，我人生第二次辭職。今天同老闆遞信，佢都有留我o既....但我講咗辭職原因是為了"跟佬走"，佢唯有話 "咁我仲有咩好講呢!"...........
冇錯，跟住老公，無話可說了。
放工了，上奶奶家吃飯，飯後急忙回家，因為又到了每天的拍拖時間，視像msn啊.........!!
唔好怪我地無聊啊...........呵呵 (long D，有時真係好無聊o家!!)
2011年2月6日星期日
有消息喇........
今年過年之前就收倒一份令我好開心的新年禮物了。
天津公司的offer有了，已經決定唻緊三月中左右，就會飛過去陪老公。
不過都傾得幾漫長o家。上次講到對方要求我再飛過去一次見佢地產品管理部的總裁，我梗係唔制啦，最終佢地都肯安排internet conference。呢個網上面試都搞咗成粒鐘。見完之後，我覺得機會都大的。
即日下午，我hunter打唻話佢地滿意呢次面試，將會俾offer我了，但佢地個HR 阿head會打電話俾我
“傾下計”先，我估呢個電話係 “attitude
test” 唻，可能佢想測試下呢個女子隻身唻到天津做嘢，又唔係日日都見倒個老公，係唔係真係甘心想做呢份工掛。
三天之後的一個晚上，佢終於打唻，係一個中年女人 (應該係做咗好多年、覺得自己地位超然嗰種呢)。佢講咗幾句 “真實說話” 但令我嬲嬲地的:
(講普通話，不過我打口語)
佢:「你有冇想過內地的工資一向都低一點，唔同你香港?」
我:「咁當然都知道，所以工選我時我都選工，低的我都不會考慮。」 (八婆吖! 想壓我!!)
佢:「其實如果我地肯請你，又俾埋屋你住，你都唔使洗錢o家啦! 所以即使人工冇你而家香港咁高，應該都好合理。」
我:「我要洗o既錢你計唔倒，因為我每年都要travel番去香港幾次。另一樣是北京的稅率高，差不多20%人工，這個我一定會計算在內!」 (去死啦!)
佢:「我地請你，你同你老公就不用一個在HK一個在北京，你都叫做 “著數咗” 啦，對不對?」
我:「……………係近咗的，不過又不是最近，始終在北京的話更好，不過暫時未找到啫。」 (家陣我攞你綜緩呀，我都要做嘢o家喎!!)
第二天我Hunter打唻，我向佢投訴果個人態度黑人憎，好似我乞工做咁 (佢請我我都係幫番佢做嘢，而家佢唔係接濟緊我喎!!)。我Hunter即刻同佢講好說話，話對方的角色係替公司save cost，如果佢用倒一個cheaper cost請倒一個公司想要的人，佢咪 “做倒嘢” 囉! 算啦你都係而家接觸到佢，一入咗去呢世都見唔倒o家喇!
三天後，有offer了 (hunter reply)，人工確之然低過我而家一截。我即刻say no! 我仲鬧咗我hunter一餐，話佢一見我CV就知我咩價錢，你俾唔起的就唔好IN我啦，仲要我飛咗去一次! 我一定唔接受，唔使講嘢!
我HUNTER响電話同 E-MAIL都向我解釋咗那邊的Management grade實質只有幾多，而我已經多出佢地幾多，但我真係唔滿意囉。呢個hunter學埋果個HR老女人的衰嘢，同我講
“唔使點用錢，有屋你住” 呢D唔啱聽o既說話，我梗係再火一d啦 (佢角度係要成事﹐差果幾千蚊佢梗係想我屈服啦)!!
最後我俾咗個bottom
line佢，少過呢個數唔好再打唻! 係咁!! 仲有就係CNY前好俾答覆我，費事有嘢牽掛住。
其實我都估倒個HR老女人有心壓我價，但我又好有信心我企緊的話佢會屈服，因為佢打唻的第一句說話，唔小心漏咗口風:
「我地2個總裁都見咗你，佢地都好滿意……..……..呀…….…不是，佢地只是說“還可以”………」
擺明就係，如果我開價不是俾CV再高好多，2個總裁都一定通過的。個老女人想試下壓我之嘛。
再三天後，有回覆了，結果係比bottom
line剛高出少少。過年之後，便會落實。 Woo!! 贏咗喇!!
我預2月11日倒啦，我收到呢份confirmation便會resign了。再計多一個月，便飛了。
呢件事由上年11月，搞到而家，終於叫做 “done”! 我都放鬆咗。
不過，將會有一排見不到香港的朋友，同家人了。我會逐一找你地聚一聚先走啊。
各位，新年快樂呀!
2011年1月13日星期四
很久沒見工....竟到這裡來!
老公於1月5日已經開始了北京工作的生活。
我比他遲了兩天過去，目的，是去見工。
之前在日誌說過，香港人在北京搵工作，真係有難度的。工資比香港低是事實，問題是低資的工作都不一定輪到你這個外省人來做。
早前，我漁翁撒網式地委托了北京大大小小的JOB HUNTER，冇30間都有20間，當中只有4間回覆我，而說的，都是同一間公司的同一個職位，是做美容部產品開發的。
他們都說 "真的很適合你......"，而很難得的是，工資方面可以貼近香港的OFFER，為一遺憾是，公司地點是在天津，不是北京。
我問他們 "北京咁大都冇其他工作能介紹了嗎?"，答案是 "沒有更適合而工資好的"。
好! 不能放過每一個機會。我搵了跟得最上心的一間HUNTER替我安排，經過 2次的電話面試，都通過了。最後是要我親身飛去那邊一次跟部門總裁見一見。
嘩.............要自己出錢買機票! 幾千蚊，係得就話啫，唔得就真係 "得個吉"。不過個HUNTER承諾 "無論怎樣也替我談好......" (雖然呢D嘢要靠自己，但出外靠朋友，聽到佢咁講都定一定o家)，就飛上去一次啦，反正老公剛過去數天，我去幫手執拾下都好。
就是這樣，我匆匆的過去了。我見的是R&D部門總裁，他週末住北京，所以面試不用我到天津，在北京的分公司。
問清楚了，公司雖然在天津，但區分是 "武清"，搭車回北京只需一小時。公司有宿舍提供 (大小是按職級來分派)，水電暖氣家具都齊，只需象徵式地交一百蚊就能住了，公司裡有飯堂，是一間典型的國內企業。每星期五下班有公司shuttle bus載員工到北京去 (很多員工、總裁級都住北京)，星期日晚載回公司。
見完那個總裁，他認為我較適合做產品管理部門，更能發揮。但唯一是產品管理部的總裁未見過我，不能直接地就僱用。他想我過年後再飛過去天津一次，見那個人，我不是很願意呢! 未見官先打八十大板!!
我對他說原本以為這是FINAL的，所以沒呢個打算，好彩他都明白囉，他說回去會好好考慮我應該放在那裡最好，還要跟那個總裁研究一下。一個星期有回覆，會是 "SORRY" 或者 "有OFFER"。
回到香港後2天，HUNTER跟我說我見的那個人已經飛咗去美國開會，臨行前叫佢HR同我個HUNTER安排一下要我再跟產品管理部的總裁面試。EEEEE.............!!! 我原以為下次溝通會有定案，原來仲要見! 我亦再表明了只限電話面試，看看如何安排囉。
但產品管理嗰個總裁會唔會覺得我太高竇呢? 工我是感興趣的，唯一是地點遠日後我不能跟老公天天住! 好似讀大學住HALL咁，但都幾有挑戰性o家。
原本做跟得夫人，而家好可能係，我自己都北上埋去"奮鬥"，估都估唔到。
距離通知期仲有兩天，唔知究竟點呢? 心急中...........................