在ESD life度看過d相，九龍灣淘大間鴻星有高樓底、冇柱、over 28圍可包場的條件，而且打電話去問過我BD那天未有人BOOK，所以專誠同肥佬去實地示察一番。
場地我真的非常滿意呢!而且佢的佈置本身已擺滿玫瑰花，我連decoration都可以慳埋，還有變色的幻彩燈光效果for新人進場用，菜式有保證，而且因為我BD係星期一，每圍仲平收$300蚊，真係好合心意呢!
我同肥佬專登申請咗好多新VISA卡，儲ASIA MILE，可能連honeymoon機票都慳倒家嘛，我地問長可否幫我地hold住個場，visa卡一出便來落訂，個部長好好，反而叫我地唔好落訂住，等到2月份的結婚展才去找他，可以再俾多d優惠我地呢!!
今次鴻星傾酒席之行，真係值100個
，大愛!!
今日同媽咪老豆一起上昨天才落訂的未來新居度，讓他們過過目。等阿媽度氣再一次降溫。
佢地睇完，眼神話俾我知佢地都幾滿意，都覺得買得幾抵，不過都不忘以責備的語氣再三提醒我搞按揭呢d嘢要小心一些，我同肥佬當然係"知道知道知道" 咁啦!
講開酒席，一向冇乜要求的我阿媽突然說很喜歡聘珍樓。難得佢有要求，我都好開心 (因為我都唔想成個結婚的籌備完全沒有父母的意見)，即時同肥佬走去尖沙咀間聘珍樓度視察。
其實菜單、服務、場地佈置、地點.....各方面都好滿意。唯一是這裡只能擺約20圍，再多便要入房睇電視望不了台，咁又唔係幾好。同埋因為這間是高級酒樓，d燈光都偏暗，令人一入唻便覺得好眼瞓、好靜局咁。
其實我想搵一間樓底高，可包場，冇柱的酒樓，最ideal是荃灣的美心皇宮，但full了!西港城大舞台都很靚，但也full了。
再上網search下先..........
事情往往都係估佢唔倒.....
今日，與肥佬的媽咪飲茶，之後於荷里活廣場行下街，見倒有間美聯，肥佬就話不如睇下樓囉。
我心想，睇咩樓啫?星河明居咩?定龍蟠苑先?前者買唔起睇唻得個吉，後者居屋唻我唔想揀囉。覺得都係waste my time，但auntie好想睇下，佢都希望睇中一個我地都喜歡的，咁咪可以住近佢老人家囉。
星河明居睇咗3個單位，梗係靚啦，個個都over270萬，根本是far far away from our budget。
回到美聯簽番d睇樓紙，個經紀話有冇考慮星河明居隔唻個屋苑悅庭軒? 間格同星河明居一模一樣o家，大家一樣咁方便，都係咁近荷里活廣場同地鐵站，爭在這屋苑是夾屋，會所o個d冇咁完善，但相對管理費好平。佢手中剛有一單位，200頭萬，問我地有冇興趣喎。
如果計o係九龍樓，方便度咁good，600呎200萬頭，咁又諗得過呀，即管去睇睇。
上到去，一開門，d裝修好靚，好新，原來上手業主只住了一年多便放盤了，他們當時是豪裝的。而且唔知點解，好似好合眼緣咁，有"家"的感覺。都值得考慮。
當晚，吃過dinner，我約番上次的睇樓專家朋友於即晚再睇一次，讓他評一評。經過一論評估，佢的reply 是"買得過，好抵!"
我叫個經紀再同業主還價8萬，原本諗住佢say no我都會買的了，點知個業主又話 "ok啦!"，個經紀話佢都估唔倒!
就係咁，2009年1月10日，6:00pm睇中一層樓，當晚的10:00pm，我便決定買了。
人地話女人買嘢係唔會考慮咁多，但........4個鐘決定買咗一層樓，會唔會癲咗d? 呢一刻我都仲好似發緊夢咁。
最開心的，除了我同肥佬做業主，當然仲有一個便是佢媽媽啦，見佢老人家笑到咁開心，都好o既。
最慘係............我媽一心以為我住荃灣，現在告訴她我一晚之間買了九龍樓，俾佢鬧到狗血淋頭呀!! 我諗佢不是嬲我住得遠咗，因為佢一向都叫我不如住近未來奶奶啦，又有人幫你執下屋又有飯食......
我諗我媽媽是嬲我，一晚之間決定買樓咁大件事，都唔同佢單聲，又怕我俾人呃，我俾佢鬧到由買完樓的興奮感覺 drop到地底，勁sad。肥佬見狀，好勇咁主動打電話俾我媽咪，解釋番成件事，都向她say sorry話冇在落訂o個刻同佢講一聲先。我媽聽到佢咁有誠意咁解釋番，都下咗啖氣了。全靠肥佬咋.....
肥佬，真係一個好老公!! 
由於肥佬突然提議今年結婚，咁早前搵相士擇的2010年日子便沒用了。
今天找她再擇過，又係集中8-10月，oh......又係擇不到星期六日的好日子。
不過相士算出有一天for 我倆唻說是super好日子，現在定了，我與肥佬的big day是.....9月21日呀!!
我要開始我的婚禮籌備生涯喇..............!!!
今日我自己約埋兩個中學同學，文仔同碧茜，呢兩位買樓專家再去睇多次爵悅庭的單位。
因為上一次我已經有一、兩個睇中的，今天主要是讓專家也看看，是否值市價。
我地三人同經紀，只花了15分鐘便睇完。我心中想，可能佢兩個都唔太prefer我揀呢度，所以都冇乜心機睇了。
完成睇樓再去食飯，佢地先話 "唔好揀工廠三寶"啦......
我話咩工廠三寶呀?原來佢地做呢行，出咗名荃灣爵悅庭、立方、樂悠居三個屋苑是"工廠三寶"。地點不好、又是工廠區，所以佢地的會所會整得特別有氣派同完善，去彌補這些不足，吸納番多d人唻買樓喎，但買咗想再放出去便難d了。而由於會所咁靚，管理費相對好貴，真係買咗，住落我就會知好肉痛咁話。
我再講話買咗樓是打算放租一年，一年後自住，諗住有人幫我供一年啦，怎知他們二口同聲說咁樣好戇居喎，有乜理由自己買層新樓回來租俾人住到殘哂，到時又要花錢唻大執咁話，其實條數係一樣，唔會話個租客幫你供樓咁so囉。
我回到家把朋友的comment告訴肥佬，佢諗落覺得又有道理o既，咁即是如果而家睇啱便可買，一買便自己供，咁樣就索性佢自己入住先了。
另外佢又提道: 不用放租一年，你有冇諗過今年結婚呢?
咦................? 我又冇諗過喎，如果真係，我咪淨番唔夠一年籌備囉?
今天做了一個八婆，同肥佬去了我一個睇開的相士度擇日子結婚。
鎖定是2010 年的冬天時份，約10-12月，讓那位相士在該時段把好日子全揀出來。
她說: 你地兩位都冬天出生，點解唔揀夏天結婚呢?會有利喎....
其實我地都冇乜preferrence，冬天時份只是想多些時間再儲多少少錢，但經佢咁講，我地都轉軚，hehe~ 
結果佢鎖定8-10月，佢好仔細o家，算了我倆的時辰八字，還有父母的生肖，若是好日子但不太夾我地的生肖或時辰佢都out走，真係盡責過黃大仙d 阿伯好多。
結果，只揀倒2日好日子出唻，還不是星期六日，有點失望。不過她說: 好日子難求，不要執著禮拜幾呢! 咁又啱喎。
現在攞住呢兩個日子，是搵酒席的時間了。
